မြန်မာနိုင်ငံမှာ ဟောပြောပွဲလုပ်မယ့် ကမ္ဘာ့အတော်ဆုံး သိပ္ပံပညာရှင်စာရင်းဝင် ဒေါက်တာစောဝေလှ

ကမ္ဘာ့အတော်ဆုံး သိပ္ပံပညာရှင် ၁၀၀ မှာပါတဲ့ ပါမောက္ခဒေါက်တာစောဝေလှက သူ့ရဲ့ဘ၀ဖြတ်သန်းမှုအတွေ့အကြုံတွေကို ရန်ကုန်မြို့မှာ ပထမဆုံးအကြိမ် ဟောပြောသွားမယ်လို့ သိရပါတယ်။

ဗဟန်းမြို့နယ် တက္ကသိုလ်ရိပ်သာလမ်းသစ်နဲ့ ဆရာစံလမ်းထောင့်က CB Center ငါးလွှာမှာ ဒီနေ့ (ဇန်နဝါရီလ ၁၀ ရက်) မွန်းလွဲ ၂ နာရီကနေ ညနေ ၅ နာရီအထိ ဟောပြောသွားမှာပါ။

ပါမောက္ခဒေါက်တာစောဝေလှရဲ့ မိဘနှစ်ပါးလုံးက စစ်တွေဇာတိဖြစ်ပြီး ရခိုင်လူမျိုးတွေလို့ သိရပါတယ်။

မြန်မာလူမျိုးထဲမှာ ထူးထူး ချွန်ချွန်ရှိလို့ ဟောပြောပွဲစီစဉ်ပြီး ဂုဏ်ပြုတာလို့လည်း မဟာနွယ်ဖောင်ဒေးရှင်းက ပွဲစီစဉ်သူ ဒေါ်မြသဇင်ညွန့်က ပြောပါတယ်။

အသက် ၅၃ နှစ်အရွယ် ပါမောက္ခဒေါက်တာစောဝေလှဟာ ၁၉၉၃ မှာ ပါရဂူကျောင်းသားဘ၀စခဲ့ပြီး ဂျာမနီဘာလင်တက္ကသိုလ်မှာ ဧည့်ပါမောက္ခအနေနဲ့သင်ပြပေးဖို့ ကမ်းလှမ်းခံခဲ့ရပါတယ်။

ဘာလင်တက္ကသိုလ်မှာ နာနိုရူပဗေဒကို လေ့လာရင်း Chemical Reaction ကို မော်လီကျူးတစ်လုံးတည်းနဲ့ ထုတ်လုပ်နိုင်တဲ့နည်းကို ရှာဖွေတွေ့ရှိခဲ့သူပါ။

ကမ္ဘာပေါ်မှာဘယ် သိပ္ပံပညာရှင်မှ မအောင်မြင်သေးတာကို ဒေါက်တာစောဝေလှက ပထမဆုံးအကြိမ် အောင်မြင်ခဲ့ပြီး ၂၀၀၀ ပြည့်နှစ်မှာ ကမ္ဘာ့ထိပ်တန်းသိပ္ပံပညာရှင် ၁၀၀ စာရင်းဝင်ခဲ့တာပါ။

လက်ရှိအချိန်မှာ အိုဟိုင်းယိုးတက္ကသိုလ်ရဲ့ ရာသက်ပန်ပါမောက္ခ တစ်ဦးဖြစ်တဲ့ ဒေါက်တာစောဝေလှဟာ အမေရိကန်နိုင်ငံ စွမ်းအင်ဝန်ကြီးဌာနရဲ့ စီမံကိန်းတွေမှာလည်း တာဝန်ထမ်းဆောင်နေပါတယ်။

Source : 7Day Daily
Photo : Robert Hardin
Credit: duwun