မူးယစ်တရားခံပြေးက သေနတ်ဖြင့် ပစ်ခတ်မှုကြောင့် ရဲတပ်သား သေဆုံး

တနင်္သာရီတိုင်းဒေသကြီး ထားဝယ်မြို့မှာ မေ ၁၄ ရက်နေ့ ညနေပိုင်းက မူးယစ် တရားခံပြေးတဦးကို ရဲတပ်ဖွဲ့ ဖမ်းဆီးစဉ် တရားခံပြေးက သေနတ်နဲ့ ပြန်လည်ပစ်ခတ်တာကြောင့် ရဲတပ်သားတဦး သေဆုံးသွားခဲ့ပါတယ်။

ပြီးခဲ့တဲ့ လပိုင်းတွေကတည်းက မူးယစ်ဆေးမှုနဲ့ ထွက်ပြေးတိမ်းရှောင်နေတဲ့ တရားခံပြေး သီဟနိုင်ဟာ ထားဝယ်မြို့ ပိန္နတောရပ်ကွက် သုခလမ်းရှိ အိမ်မှာ ရောက်ရှိကြောင်း သတင်းရလို့ ရဲအုပ်စိုးနိုင်ဦးစီးအဖွဲ့က ဝင်ရောက်ဖမ်းဆီးရာ သီဟနိုင်က သေနတ်ကိုင်ဆောင်ပြီး အိမ်နောက်ဘက်က ထွက်ပြေးသွားခဲ့ပါတယ်။

ထွက်ပြေးတရားခံပြေးဟာ ဆေးရုံလမ်းအရောက်မှာ နောက်ကနေ လိုက်လာတဲ့ ရဲတပ်သား ထွန်းယိန်း နဲ့ အောင်မြင့်မြတ်တို့ကို သေနတ်နဲ့ ၃ ချက် ပြန်လည်ပစ်ခတ်လို့ ရဲတပ်သား ထွန်းယိန်း သေနတ်ထိမှန်ခဲ့ပါတယ်။

ဒီနောက်မှာတော့ တခြားတဖက်က လိုက်လာတဲ့ ရဲအုပ်ထွန်းလင်းက တရားခံပြေးကို အုန်းတောလမ်းဆုံအရောက်မှာ ဆိုင်ကယ်နဲ့ တိုက်ပြီး ဖမ်းဆီးခဲ့တာလို့ ရဲတပ်ဖွဲ တာဝန်ရှိသူတဦးက ပြောပါတယ်။

တရားခံပြေး သီဟနိုင်နဲ့အတူ ကျည်နှစ်တောင့်ပါ M 35ပစ္စတိုသေနတ် ၁ လက်ကို သိမ်းဆည်းရမိခဲ့တယ်လို့ ဆိုပါတယ်။ ဒါ့အပြင် ပိန္နတောရပ်ကွက် သုခလမ်းရှိ အိမ်မှာပဲ သီဟနိုင်ရဲ့ အပေါင်းပါတွေဖြစ်တဲ့ ဝေယံအောင်၊ မဆုရည်ကျော်၊ မဇာခြည် ၂၀ နဲ့ မမေသူဇာထွန်းတို့ကိုလည်း WY ပန်းရောင်စိတ်ကြွဆေးပြားတို့နဲ့အတူ ဖမ်းဆီးမိခဲ့တယ်လို့ ရဲတပ်ဖွဲ့က ဆိုပါတယ်။

ဆေးရုံပို့ဆောင်ခဲ့တဲ့ ရဲတပ်သားဟာ သေနတ်ဒဏ်ရာကြောင့် သေဆုံးသွားခဲ့ကြောင်း၊ ဖမ်းဆီးမိတဲ့ တရားခံတွေကို ဥပဒေ အတိုင်းဆက်လက်ပြီး ရေးယူဆောင်ရွက်သွားမယ်လို့ ရဲတပ်ဖွဲ့က ပြောပါတယ်။

သတင်းဓာတ်ပုံ – ထွန်းကျော်မောင် / DVB