ဘယ်လိုသနပ်ခါးမျိုးကို လိမ်းခြယ်သင့်သလဲ

မြန်မာနိုင်ငံမှာ သနပ်ခါးမျိုးပေါင်းများစွာ ရှိပါတယ်။ သနပ်ခါးအားလုံးနီးပါးဟာ အပူပိုင်းအညာဒေသက ထွက်ပါတယ်။ မကွေးတိုင်းဒေသကြီး၊ မန္တလေးတိုင်းဒေသကြီး၊ စစ်ကိုင်းတိုင်းဒေသကြီး-တို့မှာ သနပ်ခါး လှိုင်လှိုင်ထွက်ပါတယ်။ မြန်မာသနပ်ခါးစစ်စစ်ဟာ စတင်စိုက်ပျိုးချိန်မှစပြီး ပျမ်းမျှ(၃၅)နှစ်ကြာမှ ရောင်းတန်းဝင်ပါတယ်။ မြန်မာလူမျိုးတို့ဟာ ဟိုးရှေးပဝေသဏီခေတ်အဆက်ဆက်ဖြစ်တဲ့ လွန်ခဲ့တဲ့ နှစ်ပေါင်း(၂၀၀၀)လောက်ကတည်းက သနပ်ခါးကို စတင်လိမ်းကျံသုံးစွဲခဲ့တယ်လို့ သိရပါတယ်။ မြန်မာနိုင်ငံမှာ နာမည်အကြီးဆုံးသနပ်ခါးတွေကတော့ ရွှေဘိုသနပ်ခါးနဲ့၊ ရှင်မတောင်သနပ်ခါး ဖြစ်ပါတယ်။

သနပ်ခါး

ရွှေဘိုသနပ်ခါးကို စစ်ကိုင်းတိုင်းဒေသကြီး ဒေသအနှံအပြားမှာ စိုက်ပျိုးလေ့ရှိပြီး၊ ရှင်မတောင်သနပ်ခါးကိုတော့ မကွေးတိုင်းနဲ့ မန္တလေးတိုင်းဒေသကြီးတို့ကနေ ထွက်ရှိပါတယ်။ ဒါ့အပြင် မြန်မာနိုင်ငံမှာ အောင်မြင်ဖြစ်ထွန်းလျှက် ရှိတဲ့ ထိုင်ဝမ်သနပ်ခါး(ခ)ငါးနှစ်သနပ်ခါးဆိုတာလည်း ရှိပါသေးတယ်။ သနပ်ခါးအမျိုးအစားနဲ့ မြေရေသဘာဝကို လိုက်ပြီး ကွဲပြားမှုတွေ ရှိပါတယ်။ အချို့မြန်မာအမျိုးသမီးများဟာ သနပ်ခါးအတုအစစ် မခွဲတတ်လို့ သစ်ပုလွေသား၊ သီးသား-စတာတွေကို ၀ယ်မိတတ်ပါတယ်။

ရွှေဘိုသနပ်ခါးဟာ ရှင်မတောင်သနပ်ခါးနဲ့ယှဉ်ရင် ပင်စည်လှီပါတယ်။ အပွေးအနည်းငယ် စိတ်ပြီး၊ ပိုပြီးမာကျောပါတယ်။ လိမ်းလိုက်တဲ့အခါမှာ အနံ့တဖြည်းဖြည်းမွှေးလေ့ရှိပြီး အသားအရေကို ဖြူစင်ဝင်းမွတ်မှုမှာ အခြားသနပ်ခါးထက် ပိုပါတယ်။ ချွေးပျံလေ မွှေးလေလို့ ဆိုရိုးရှိပါတယ်။ ရှင်မတောင်သနပ်ခါးကတော့ ပင်စည်လှပြီး ရွှေဘိုသနပ်ခါးနဲ့ယှဉ်ရင် အခေါက်ပါးပါတယ်။ အနံ့လည်း ပိုသင်းသယောင် ရှိပြီး ချွေးအစိုမခံပါဘူး။ ခဏပျက်တတ်ပါတယ်။ အသားရေနူးညံ့မှုကို ပေးပြီးချောမွေ့စေပါတယ်။ ထိုင်ဝမ်သနပ်ခါး(ခ) ငါးနှစ်သနပ်ခါးကတော့ သက်တမ်းအကြာဆုံး ငါးနှစ်လောက်ဆိုရင် ခုတ်ပြီး အသုံးပြုလို့ရပါပြီး။

ပင်စည်ဟာလည်း ကြီးမားလှပြီး အပွေးဖြောင့်ကာ အသားပွပါတယ်။ အနံ့အသက်လည်း နည်းပါတယ်။ အခန့်မသင့်ရင် တင်းတိပ်ကိုဖြစ်စေတယ်လို့ အသုံးပြုဖူးသူတွေက ဆိုပါတယ်။ ဒါပေမယ့် စီးပွားကို အမြန်ဖြစ်စေလို့ တောင်သူတွေ သဘောတကျ စိုက်ပျိုးပါတယ်။ စိုက်ပျိုးရလည်း လွယ်ကူပြီး အချိန်အကြာကြီးလည်း မစောင့်ရလို့ ငွေရလွယ်ပါတယ်။ ဒါပေမယ့် မြန်မာ့သနပ်ခါးနဲ့ ယှဉ်ရင် ဈေးနှုန်းတစ်ဝက်လောက် နည်းပါးပါတယ်။ ဥပမာ မြန်မာသနပ်ခါးအပင်တစ်ပင်လျှင် ရောင်းဈေး အနည်းသုံးသောင်းမှ ငါးသောင်းလောက်အထိ ပေါက်ဈေးရှိပြီး၊ ၎င်းစိုက်ပျိုးရေးသနပ်ခါးကတော့ အနည်းဆုံး နှစ်သောင်းကျပ်မှ အများဆုံး သုံးသောင်းလောက်သာ ဈေးရှိပါတယ်။

မြန်မာ့သနပ်ခါးစစ်စစ်ဟာ ဘေးထွက်ဆိုးကျိုး လုံးဝနည်းပါးပြီး၊ အသားအရေကို ဖြူစင်ဝင်းမွတ်စေပါတယ်။ နှစ်ပေါင်းကြာရှည်စွာ ယုံယုံကြည်ကြည်သုံးစွဲလာခဲ့တဲ့ သက်သေလည်း ရှိနေလို့ အခြားနိုင်ငံများကပါတကူးတက ၀ယ်ယူရတဲ့ ကုန်စည်ဖြစ်ပါတယ်။ နန်းတော်သုံးလက်စွဲဆေးတစ်မျိုးဖြစ်တဲ့အပြင် သနပ်ခါးကို သွေးပြီးသောက်ပါကလေနာရောဂါ၊ ၀မ်းဗိုက်ရောဂါအမျိုးမျိုး၊ နေမကောင်းဖျားနာခြင်း၊ သူငယ်နာ-စတာတွေကို နိုင်နင်းပါတယ်။ သုံးစွဲဖို့ အကောင်းဆုံးသနပ်ခါးကတော့ ခေတ်အဆက်ဆက် အသုံးများခဲ့တဲ့ ရွှေဘိုသနပ်ခါးနဲ့ ရှင်မတောင်သနပ်ခါးဟာမြန်မာအမျိုးသမီးများအတွက် အသင့်တော်ဆုံးဖြစ်ပါတယ်။

နတ်စည်တော် (Shwemom)