အဆိပ်သင့်အနမ်းများ

ကော်ဖီဆိုင်ဟု အမည်တပ်ထားသော ဆိုင်လေးထဲသို့ ဆယ်ကျော်သက် စုံတွဲတစ်တွဲ ဝင်ရောက်လာပြီး “အခန်းရှိသေးလား” ဆိုသောအသံက ဆယ်ကျော်သက် လူငယ်ကောင်လေးထံမှ ထွက်ပေါ်လာသည်။
ဆယ်ကျော်သက် ကောင်မလေးက သူ၏ချစ်သူကောင်လေး၏ လက်ကို မြဲမြံစွာ ဆုပ်ကိုင်ထားသည်။ ကော်ဖီဆိုင်နှင့် “အခန်း ရှိသေးလား” ဆိုသော မေးခွန်းက လားလား မျှ မသက်ဆိုင်ဟု ထင်ရသော်လည်း အမှန်တကယ်ပင် ကော်ဖီဆိုင်ဟု အမည်တပ် ထားသည့်ဆိုင်တွင် အတွဲများအတွက် အခန်းငယ်လေးများ စီစဉ်ပေးထား ကြသည်။

အဆိုပါဆိုင်သည် မြို့သစ်ပိုင်းဟု ခေါ်သော မန္တလေးမြို့တွင်းနှင့် မလှမ်းမကမ်းနေရာတွင် တည်ရှိပြီး ဆိုင်သည် အပြင်ပန်းမှ ကြည့်လျှင် Café Shop ဟု ထင်ရသော်လည်း အတွင်းပိုင်းတွင် မီးရောင် ဖျော့ဖျော့ဖြင့် အခန်းငယ် ကလေးများ ကန့်ထားသည်။

ဆယ်ကျော်သက် လူငယ်စုံတွဲက မီးအရောင်ဖျော့ဖျော့ ထွန်းထားသော အခန်း ငယ်တစ်ခန်းသို့ ဝင်သွားပြီး ဆူညံသော သီချင်းသံများ အဆိုပါ အခန်းငယ်လေးထဲမှ တစ်ချက်တစ်ချက် အခန်းပြင်သို့ ပျံ့လွင့်လာသည်။ အမှောင်ဆိတ်ကွယ်ရာသည် လူတို့၏ မသိစိတ်ကို နိုးကြားစေပြီး မီးရောင်ဖျော့သော အခန်းငယ်တွင် စုံတွဲတို့သည် မတွေ့မကြုံ ဖူးသေးသည့် အတွေ့အကြုံ သစ်နှင့် ပျော်ဝင်မှု အသစ်အဆန်းများ ရှာဖွေမည်မှာ မလွဲဧကန်ပင် ဖြစ်သည်။

မန္တလေးသည် မြို့လယ်တွင် ဆေးတက္ကသိုလ်၊ မြို့ပြင်တွင် အသက်မွေးဝမ်း ကျောင်းဆိုင်ရာ ကွန်ပျူတာနှင့် နည်းပညာ တက္ကသိုလ်များ၊ ဝိဇ္ဇာ၊ သိပ္ပံ တက္ကသိုလ်များ တည်ရှိပြီး ကျောင်းသားအများစု နေထိုင်ရာ မိန်းဟုခေါ်သော မဟာမြိုင်ရပ်ကွက်နှင့် ချမ်းမြသာစည် မြို့သစ်များတွင် Café Shop အအေးခန်း ကော်ဖီဆိုင် အမည်တပ်၍ အတွဲများအတွက် အခန်းငယ်လေးများ ဖန်တီးထားသည့်ဆိုင်များ ယခုနှစ်ပိုင်း အတွင်း ပိုမိုတွေ့ မြင်လာရသည်။

အဆိုပါဆိုင်များတွင် အခန်းငှား ရမ်းခသည် နာရီပိုင်းလိုက်၍ ဈေးနှုန်း သတ်မှတ်ထားကြပြီး တစ်နာရီလျှင် ငွေကျပ် ၁၅၀၀ ကျပ်မှ ငွေ ၄၀၀၀ ကျပ်အထိ ရှိကာ နေရာနှင့် အခန်း အမျိုးအစားများကို လိုက်၍ ဈေးအမျိုးမျိုး ရှိကြောင်း စုံစမ်း သိရှိရသည်။

“ကျွန်တော်တို့က လွတ်လွတ်လပ် လပ်တွေ့ချင်လို့ သီးသန့်အခန်းတွေနဲ့ ချိန်းတွေ့ ကြတာပါ။ မန္တလေးမှာက ဘုရားတွေ ပေါတော့ အဲလိုနေရာတွေကို ချိန်းလို့မသင့်ဘူး။ အေးအေးဆေးဆေး ထိုင်လို့ရမယ့် နေရာတွေကို ရွေးချယ်သွားတာပါ” ဟု မန္တလေးမြို့မှ ရတနာပုံတက္ကသိုလ် အဝေးသင် ကျောင်းသားတစ်ဦးက ပြောသည်။
ကော်ဖီဆိုင် အခန်းငယ်လေးများ ကဲ့သို့ပင် မန္တလေးမြို့ကျုံးပတ်လည် သည်လည်း ညနေအချိန် စုံတွဲများ အများဆုံး လာရောက်နေရာ ဖြစ်သည်ဟု ဒေသခံများ ထံမှ စုံစမ်းသိရှိရသည်။

“ကျုံးဘေးမှာ ညနေအချိန်ဆို စပြီ။ အတွဲတွေ နိုင်ငံခြားကားထဲက လိုမျိုး နမ်းတဲ့သူက နမ်း။ ကိုရီးယားထဲကလို ကျောပိုးပြီး သွားတဲ့သူကသွား။ ပေါင်ပေါ်တက်ခွတဲ့သူ ကခွနဲ့။ တစ်ခါတစ်ခါ တော်တော်ဆိုးတဲ့ အတွဲတွေလည်း တွေ့ဖူးတယ်။ မြင်သူမရှက် ယိုသူရှက်ပဲ” ဟု မန္တလေးမြို့ခံ ကိုယ်ပိုင် စီးပွားရေး လုပ်ကိုင်နေသူ အသက် ၃၂ နှစ် အရွယ်ရှိ ဦးဖြိုးလေးက ဆိုသည်။

မန္တလေးမြို့တွင် ယခင်က ရှိခဲ့သော ဥယျာဉ်များ၊ ကျုံးတောင်ဘက်တွင် ရှိသော ဗိုလ်ချုပ်အောင်ဆန်း မြင်းစီးကြေးရုပ် အပါအဝင် ရေပေါ်စားသောက်ဆိုင်များ မရှိတော့ဘဲ KTV၊ စင်တင်များ ခေတ်စား လာပြီး ကျုံးဘေးတွင်လည်း စုံတွဲတို့၏ မဖွယ်မရာ အပြုအမူများကြောင့် အများ ပြည်သူအတွက် အပန်းဖြေ နားခိုစရာ ရှားပါးလာနေပြီဟု မြို့ခံများက ဆိုကြသည်။

မန္တလေးကျုံးပတ်လည်သည် အများ ပြည်သူအတွက် အခမဲ့ အပန်းဖြေနား နေရာတစ်ခု ဖြစ်ပြီး မန္တလေး-စစ်ကိုင်းလမ်း ရှိ ဥယျာဉ်တစ်ခုသည်လည်း အခမဲ့ အပန်းဖြေ နားနေရာ ဖြစ်သည်။ တိရစ္ဆာန် ဥယျာဉ်၊ မြို့တော်ဥယျာဉ်၊ အစရှိသည့် နေရာများသည် အပန်းဖြေနား နေရာများ ဖြစ်သော်လည်း ဝင်ကြေးပေးဆောင်ရသည့် နေရာများ ဖြစ်သည်။

ကျုံးပတ်လည်တွင် အတွဲများက မဖွယ်မရာပြုလုပ်ပြီး ညသန်းခေါင်အချိန်ထိ ရှိနေခြင်း၊ ကျုံးဘေးတွင် အုပ်စုဖွဲ့ဓားခုတ် မှုများ ဖြစ်ပွားခြင်း တို့ကြောင့် ကျုံးဘေးတွင် ည ၉ နာရီ နောက်ပိုင်းတွင် နေထိုင်ခွင့်မရှိဟု မန္တလေးတိုင်းဒေသကြီး ရဲတပ်ဖွဲ့ရုံးက တားမြစ်ခဲ့သည်။

“ပိုက်ဆံမပေးရဘဲ လွတ်လွတ်လပ်လပ် အပန်းဖြေလို့ရတဲ့ နေရာက မြို့နဲ့ အလှမ်းဝေးတယ်၊ နောက်တစ်ခုက သွားလို့ မသင့်အောင် အတွဲတွေနဲ့ ရှုပ်နေတယ်။ ဓားခုတ်မှု စတာတွေလည်း ဖြစ်တယ်။ ဝင်ကြေးပေးပြီး သွားရမယ့် နေရာမျိုးကျ ပြန်တော့လည်း တစ်ဦးကို ၅၀၀ ကျပ် လောက်ရှိတယ်။ ကျွန်တော်တို့လို ဆင်းရဲသားတွေ ကတော့ မိသားစုလိုက် ဝင်ကြေးပေး မသွားနိုင်ဘူး။ အဲဒီတော့ အပန်းဖြေဖို့ နေရာရှားလာတယ်” ဟု မန္တလေးမြို့ မြရည်နန္ဒာ မြို့သစ်နေ လက်လုပ် လက်စားလုပ်ကိုင်သူ အသက် ၄၅ နှစ် အရွယ် ဦးဘငွေက ဆိုသည်။

ပြည်သူ့အပန်းဖြေနေရာ ရှားပါးမှု သည် လူငယ်စုံတွဲများအတွက် တစ်နည်းအားဖြင့် လည်ပတ်စရာ နေရာရှားပါးစေပြီး အပန်းဖြေရန် နေရာရှာရာမှ ဆိတ်ကွယ်ရာ နေရာ ရောက်ရှိစေသည့် တွန်းအားတစ်ရပ် ဟု ဆိုရပေမည်။

“အပန်းဖြေ နေရာတွေက နည်းတယ်။ ရှိတဲ့နေရာ တွေကလည်း လူတွေပြည့် သိပ်ကျပ်။ ဥယျာဉ်ထဲ ထိုင်ခုံမရှိဘာမရှိနဲ့ တကယ် အဆင်မပြေဘူး။ ဒါ့ကြောင့် အေးအေးလူလူ နေလို့ရတဲ့ နေရာ ရှာဖွေရင်း သူငယ်ချင်းတွေ ပြောကြတဲ့ နေရာတွေ ရောက်သွားတယ်။ ဒါပေမဲ့ တကယ့်ဥယျာဉ် လိုမျိုး အပန်းဖြေဖို့ ကောင်းတဲ့ နေရာတွေ ရှိရင် ဝင်ကြေးပေးရ ပါစေဦးတော့ ကျွန်တော်တို့ သွားမှာပါ” ဟု မန္တလေးမြို့ နည်းပညာတက္ကသိုလ် ဒုတိယနှစ်ကျောင်းသား တစ်ဦးက ဆိုသည်။

အမျိုးသားလွှတ်တော် ကိုယ်စားလှယ် ဦးဖုန်းမြင့်အောင်က “လူထုတွေ အတွက် အပန်းဖြေဥယျာဉ်တွေ ဖော်ဆောင် ပေးသင့်တယ်။ အများပြည်သူ လူသွားလမ်း နေရာတွေမှာ ထိုင်ခုံတွေထားပေးတာ တို့လိုမျိုး လုပ်ပေးတာကတော့ အစိုးရက လုပ်ပေးသင့်တယ်။ Entertainment သဘောမျိုး အထဲမှာ- စိတ်အပန်းဖြေ၊ လူ အပန်းဖြေဖို့ လုပ်ဆောင်ပေး ထားတာတွေ၊ ပစ္စည်းတွေ ပါရင်တော့ ပုဂ္ဂလိကကို ကန်ထရိုက် ပေးလုပ်ရမယ်။ ဒါတွေကို ဝင်ကြေးသဘောမျိုး သတ်မှတ်ပြီး လုပ်ပေးလို့ ရတယ်” ဟု ပြောကြားသည်။

မန္တလေးမြို့တော် စည်ပင်သာယာ ရေးကော်မတီ လမ်းတံတားဌာနမှ တာဝန် ရှိသူတစ်ဦးက မဟာအောင်မြေမြို့နယ် ၆၂ လမ်းရှိ မနော်ရမံဥယျာဉ်နှင့် လမ်း ၄၀ ကြားတွင် ပေ ၃၅၀ အကျယ် လူထုအပန်းဖြေ နေရာတစ်ခုကို ၂၀၁၄ ခုနှစ် မတ်လကုန် အပြီးတည် ဆောက်သွားမည်ဖြစ်ကြောင်း ပြောကြားသည်။

“အရင်ဆုံး Public Center လုပ်မယ့်ဧရိယာမှာ ရှိနေတဲ့ ပျိုးခြံတွေ အားလုံး ရှင်းပြီးပြီ။ မနော်ရမံ ချောင်းရှေ့က ဧရိယာကိုယူပြီး တံတားအပြည့် ခင်းမယ်။ အောက်ကချောင်း ကိုလည်း ရေစီးရေလာ မထိခိုက်အောင် လုပ်မယ်။ အားကစား ပစ္စည်းတွေ ထားမယ် မထားဘူး ဆိုတာတော့ မသိသေးဘူး။ အဓိကကတော့ ပြည်သူလူထုတွေ အပန်းဖြေ စုစည်းနိုင်အောင်ပါ” ဟု အဆိုပါ တာဝန်ရှိသူက ပြောကြားသည်။

ဆယ်ကျော်သက်လူငယ် စုံတွဲ က Café Shop ရှိ သီးသန့် အခန်းငယ်လေးမှ ထွက်ခွာလာသည်။ သူတို့နှစ်ဦးမျက်နှာတွင် ကြည်နူးရိပ်များကို တွေ့မြင်ရသည်။ စုံတွဲတို့ သဘာဝ အခန်းငယ်ထဲတွင် ချစ်သူအချင်းချင်း နမ်းရှုတ်ချင် နမ်းရှုတ်ကြဖွယ် ရှိပေလိမ့် မည်။ သို့သော် ထိုအနမ်းများသည် အရွယ် မတိုင်ခင် အိမ်ထောင်ကျခြင်း၊ ကိုယ်ဝန် ဖျက်ချခြင်းနှင့် အန္တရာယ်ရှိသော အတွေ့ အကြုံသစ်များကို စမ်းသပ်ကြခြင်းများ အပါအဝင် လူငယ်တို့၏ အနာဂတ်ကို ဖျက်ဆီးမည့် အဆိပ်သင့်အနမ်းများ မဖြစ်ရန် လိုသည်။

Credit: Original Writer