အမေရိကန်တပ်ဖွဲ့ဝင် ၁၉ ဦးသေဆုံးခဲ့သည့် ဗုံးဖောက်ခွဲသူ ဖမ်းဆီးရမိ

အာမက်အယ်လ် မူဂါစလ်။ (ဓာတ်ပုံ - အန်စီတီစီ)

၁၉၉၆ ခုနှစ်က ဆော်ဒီအာရေးဗီးယားနိုင်ငံမှာ အမေရိကန်တပ်ဖွဲ့ဝင် ၁၉ ဦး သေဆုံးခဲ့တဲ့ ဗုံးဖောက်ခွဲမှုမှာ အဓိက သံသယရှိသူကို ဖမ်းဆီးရမိပြီလို့ သြဂုတ် ၂၆ ရက်က ဆော်ဒီ သတင်းစာတစောင်မှာ ဖော်ပြပါတယ်။

အသက် ၄၈ နှစ်အရွယ် ဆော်ဒီနိုင်ငံသား အာမက်အယ်လ် မူဂါစလ် (Ahmed al-Mughassil) ဟာ အနှစ် ၂၀ လောက် တိမ်းရှောင်နေခဲ့ပြီး ရုပ်ပြောင်းရုပ်လွှဲ လုပ်ထားတယ်လို့လည်း သတင်းစာက ဆိုပါတယ်။

သူ့ကို လက်ဘနွန်နိုင်ငံ၊ ဘေရွတ်မြို့တော်မှာ ဖမ်းဆီးရမိတာဖြစ်ပြီး ဆော်ဒီအာရေးဗီးယားနိုင်ငံကို ပြန်လည်လွှဲပြောင်းပေးမှာ ဖြစ်တယ်လို့လည်း သတင်းစာမှာ ဖော်ပြပါတယ်။

သူ့ကို ဖမ်းဆီးရမိတာနဲ့ပတ်သက်ပြီး ဆော်ဒီအာဏာပိုင်တွေဘက်က ထုတ်ဖော်ပြောဆိုတာ မရှိသေးပေမယ့် အမေရိကန် အာဏာပိုင်တွေကတော့ အတည်ပြုပါတယ်။

သူ့ကို အမေရိကန်တပ်ဖွဲ့ဝင် ၁၉ ဦးနဲ့ ဆော်ဒီနိုင်ငံသား တဦးတို့ကို သတ်ဖြတ်မှု အတွက်နဲ့လည်း အမေရိကန် တရားရုံးတရုံးက စွဲချက်တင်ထားတာပါ။

၁၉၉၆ ဗုံးဖောက်ခွဲမှုဟာ ကိုဘာမြို့က အမေရိကန်တပ်ဖွဲ့ဝင်တွေ နေထိုင်တဲ့ အဆောက်အဦးကို ကုန်တင်ကားဗုံးနဲ့ ပစ်မှတ်ထား ဖောက်ခွဲခဲ့တာဖြစ်ပြီး ဟစ်ဇ်ဘိုလာနဲ့ အီရန်နိုင်ငံက နောက်ကွယ်က ပါဝင်တယ်လို့ အမေရိကန်နိုင်ငံက စွပ်စွဲခဲ့ပါတယ်။

မူဂါစလ်ဟာ ဘေရွတ်မြို့တော်မှာ နေထိုင်နေတယ် ဆိုတာကို ဆော်ဒီထောက်လှမ်းရေး အာဏာပိုင်တွေက သတင်းရရှိခဲ့တယ်လို့ ဆော်ဒီလုံခြုံရေး သတင်းရင်းမြစ်တခုကို ကိုးကားပြီး သတင်းက ဆိုပေမယ့် သူ့ကို ဖမ်းဆီးရမှု အသေးစိတ်ကို ဖော်ပြခြင်းတော့ မရှိပါဘူး။

DVB