"iPhone အတု အလုံးအရင်းထုတ်သည့် ကုမ္ပဏီကို တရုတ်ရဲတပ်ဖွဲ့ ဖမ်းဆီး"

ယခုနှစ်တွင် ယွမ် သန်း ၁၂၀ (အမေရိကန်ဒေါ်လာ ၁၉.၆ သန်း) ခန့် တန်ဖိုးရှိသော iPhone အတု ၄၀,၀၀၀ ကျော်ကို ထုတ်လုပ်ခဲ့သည့် ဘေကျင်းအခြေစိုက် ကုမ္ပဏီတစ်ခုကို တရုတ်ရဲတပ်ဖွဲ့က ဖမ်းဆီးခဲ့ကြောင်း သိရသည်။

ဘေကျင်းရဲတပ်ဖွဲ့သည် iPhone အတုများ အလုံးအရင်းထုတ်လုပ်မှုအတွက် သံသယရှိသူ ၉ ဦးကို ဖမ်းဆီးခဲ့ပြီး ကုမ္ပဏီ၏ စက်ရုံတွင် ဖုန်းတပ်ဆင်သည့်လိုင်း ၆ ခုနှင့် ဆဲလ်ဖုန်းအစိတ်အပိုင်း တစ်သန်းကျော်ကို ရှာဖွေတွေ့ရှိခဲ့ကြောင်း ပြောကြားခဲ့သည်။

အမေရိကန်တွင် တရုတ်နိုင်ငံလုပ် ဆဲလ်ဖုန်းအတုများကို သိမ်းဆည်းခဲ့ပြီးနောက် အဆိုပါ ကုမ္ပဏီနှင့် ပတ်သက်၍ စုံစမ်းမှုများကို ရဲတပ်ဖွဲ့က မေလမှ စတင်ကာ ပြုလုပ်ခဲ့ခြင်း ဖြစ်သည်။

အဆိုပါကုမ္ပဏီသည် ဖုန်းမားသားဘုတ်များကို နိုင်ငံခြားမှ ဝယ်ယူခဲ့ပြီး အမှတ်တံဆိပ်နှင့် အခြားအစိတ်အပိုင်းများကို ရှန်ကျန်းမြို့မှ ဝယ်ယူခဲ့ကြောင်း ရဲတပ်ဖွဲ့မှ ပြောကြားခဲ့သည်။

၎င်းကုမ္ပဏီသည် ဖုန်းအစိတ်အပိုင်းများကို တပ်ဆင်ရန် အလုပ်သမား ရာပေါင်းများစွာကို ငှားရမ်းခဲ့ပြီးနောက် ဖုန်းအတုများကို အခြားနိုင်ငံများထံ ရောင်းချခဲ့ခြင်း ဖြစ်သည်။

iPhone အတုများ ထုတ်လုပ်ရောင်းချသည့် ကုမ္ပဏီ၏ အမည်ကို ရဲတပ်ဖွဲ့မှ ထုတ်ဖော်ပြောကြားခဲ့ခြင်း မရှိပေ။

Internet Journal