ကချင်ဆရာမ ၂ ဦး သတ်ဖြတ်မှု ဆက်လက်စစ်ဆေး၊ စွပ်စွဲမှုတွေကို တပ်မတော် သတိပေး

ရှမ်းပြည်နယ်၊ မူဆယ်ခရိုင်၊ ကောင်းခါးကျေးရွာမှာ ကချင်နှစ်ခြင်း ခရစ်ယာန် အဖွဲ့ချုပ်က ကျောင်းဆရာမုနှစ် ဦး အဓမ္မပြုကျင့် သတ်ဖြတ်ခံရမှုနဲ့ ပတ်သက်ပြီး ရွာသား ၆ ဦးကို မူဆယ်မြို့နယ် တရားရုံးမှာ ဒီနေ့ စစ်ဆေး
နေပါတယ်။

တရားရုံးက လျှို့ဝှက်စစ်ဆေး နေတာ ဖြစ်တယ်လို့ မူဆယ်မြို့နယ် ကချင်နှစ်ခြင်း ခရစ်ယာန် အဖွဲ့ချုပ်က ဦးဇော်ရာ က ပြောပါတယ်။

"ဒီနေ့ကျတော့ ရွာသားတွေ ၆ ယောက်လောက်ကို မူဆယ်မှာပြန်စစ်မယ်၊ ကျနော်ကြည့်ရတာတော့ အား လုံးစစ်ပြီးလောက်ပြီ၊ နောက်ထပ် ပြန်စစ် ပြန်စစ်နဲ့ပေါ့ အဲ့လိုမျိုးထပ်နေတာပေါ့၊ အရင်ကတော့ ဘာမှမပြော
သေးဘူးဗျ၊ သူတို့ထုတ်ပြန်ချက်လည်း မထုတ်သေးဘူး၊ ကျနော်တို့ ဆက်စောင့်ကြည့်နေတယ် ရဲ စစ်တပ်
တွေကို စောင့်ပြီးတော့ပေါ့၊ ကျနော်တို့လည်း အမှုမှန်ပေါ်ပေါက်ဖို့ ကျနော်တို့လည်း စောင်ကြည့်နေတာပေါ့၊ မနေ့ကတော့ ရွာမှာစစ်တယ် ဒီနေ့ကတော့ မူဆယ်မှာပြန်စစ်တယ်၊ ရဲက သူတို့ကို လျှို့ဝှက်ချက်နဲ့စစ်နေ
တော့ ကျနော်တို့လည်း မသိဘူး"

ကချင်ကျောင်းဆရာမ နှစ်ဦးသေဆုံးမှုအတွက် ရွာသားတွေအပြင် ကောင်းခါးကျေးရွာအနီးက အစိုးရ တပ် မတော်စစ်ကြောင်းက တပ်မတော်သားတွေကိုလည်း မူဆယ်ခရိုင်ရဲတပ်ဖွဲ့က ခေါ်ယူစစ်ဆေးနေတယ်လို့ သိရပါတယ်။

ရဲတပ်ဖွဲ့တွေရဲ့စစ်ဆေးတွေ့ရှိချက်အရ ပြစ်မှုကျူးလွန်သူဟာ တပ်မတော်သားတွေ ဖြစ်နိုင်ဖွယ်မရှိကြောင်း၊ တပ်မတော်က ဒီနေ့ သတိပေးထုတ်ပြန်လိုက်ပါတယ်။ ဒါ့ပြင် အဲ့ဒီမုဒိန်းကျင့်သတ်ဖြတ်ခံရတဲ့ကိစ္စနဲ့ ပတ် သက်ပြီး စုံစမ်းစစ်ဆေးနေတဲ့ကာလအတွင်း တပ်မတော်ကို ပုတ်ခတ်ရေးသားပြောဆိုသူတွေ ရှိနေကြောင်း၊ စွပ်စွဲပြောဆိုမှုတွေကို တရားဥပဒေနဲ့အညီ ဆောင်ရွက်သွားမှာဖြစ်ကြောင်း တပ်မတော်က နိုင်ငံပိုင်သတင်း စာတွေကနေ ဒီနေ့ သတိပေးထုတ်ပြန်လိုက်တာပါ။

RFA Burmese