ဖိုးလပြည့်၏ စော်ကားခံရခြင်း မှန်ကန်ဟု ကာယကံရှင် ပြောပြီ

၂၀၁၁ ခုနှစ်က ကုတင် ၅၀၀ ဆန့် ကလေးအထူးကု ဆေးရုံကြီး ဖွင့်ပွဲတွင် ဗိုလ်ချုပ်မှူးကြီးဟောင်း၏ မြေးကို တွေ့ရစဉ်
(ဓာတ်ပုံ – Demo Kaungkin / Burma Today)

အငြိမ်းစား ဗိုလ်ချုပ်မှူးကြီး သန်းရွှေ၏မြေး နေရွှေသွေးအောင် (ခေါ်) ဖိုးလပြည့်က မီးပွိုင့်တွင် ကားလမ်းရှင်းပေးသည့် ကိစ္စနှင့် ပတ်သက်၍ ကိုယ်ထိလက်ရောက် စော်ကားခံခဲ့ရခြင်းမှာ ဟုတ်မှန်ကြောင်း ယဉ်ထိန်းရဲတပ်သား စံသိန်းထွေးက ဧရာဝတီသို့ အတည်ပြု ပြောဆိုသည်။

ကောလာဟလများ ပျံ့နှံ့နေသကဲ့သို့ ငွေကြေး လက်ခံရယူမှု မရှိခဲ့ကြောင်း၊ ဂျာနယ်တချို့တွင် ဖော်ပြထားသော နှစ်ဘက်ကျေအေးသည် ဆိုသည်မှာ လုံးဝမဟုတ်ဘဲ ၎င်းအနေဖြင့် အေးအေးဆေးဆေးသာ နေလိုသောကြောင့် မည်သည့်အဖွဲ့အစည်းကိုမျှ တင်ပြတိုင်ကြားတော့မည် မဟုတ်ကြောင်း ရဲတပ်သား စံသိန်းထွေးက ရှင်းပြသည်။

တပ်သားစံသိန်းထွေးမှာ ၎င်း တာဝန်ထမ်းဆောင်နေသော နေရာကို ဖော်ထုတ်ပြောဆိုရန်နှင့် ဧရာဝတီ သတင်းဋ္ဌာနနှင့်
လူချင်းတွေ့ဆုံရန်လည်း ငြင်းဆိုသည်။

“ကျနော် အေးအေးဆေးဆေးပဲ နေချင်တယ်။ ဘယ်အဖွဲ့အစည်းနဲ့မှလည်း မဆက်သွယ်ချင်ဘူး” ဟု သူက ပြောသည်။

ကမာရွတ်မြို့နယ် ယာဉ်ထိန်း တပ်ဖွဲ့စုရုံး အမှတ် ၂၅ မှ တာဝန်ကျ အရာရှိ၏ အဆိုအရ တပ်သားစံသိန်းထွေးကို ၎င်းတို့ ဋ္ဌာန အင်အားမှ ထုတ်နုတ်သွားပြီ ဖြစ်ပြီး နေပြည်တော်မှ ခေါ်ယူထားသည်ဟုသာ နောက်ဆုံး သိရှိရကြောင်း သိရသည်။

နေပြည်တော် ယဉ်ထိန်းတပ်ဖွဲ့မှူးရုံးကမူ ယဉ်ထိန်းရဲတပ်သား စံသိန်းထွေးကို နေပြည်တော်တွင် ခေါ်ယူထားခြင်းမှာ မဟုတ်မှန်ဘဲ ရန်ကုန်ရုံးသို့ ပြန်လည်ပို့ဆောင်လိုက်ပြီ ဖြစ်သောကြောင့် ရန်ကုန်တွင်သာ စုံးစမ်းမေးမြန်းရန် ပြောကြားသည်။

ယခုအခါ တပ်သား စံသိန်းထွေးမှာ ရန်ကုန်မြို့ရှိ ၅၁ လမ်း ယဉ်ထိန်းရုံးတွင် တာဝန် ထမ်းဆောင်နေကြောင်း ဧရာဝတီ သတင်းဋ္ဌာန၏ စုံစမ်း သိရသည်။

အငြိမ်းစား ဗိုလ်ချုပ်မှူးကြီး သန်းရွှေ၏မြေး နေရွှေသွေးအောင် (ခေါ်) ဖိုးလပြည့်နှင့် ပြဿနာတက်ခဲ့သော ယဉ်ထိန်းရဲ တပ်သား စံသိန်းထွေးကို နေပြည်တော်ရှိ အကြီးအကဲတဦးက မတ်လကုန်ပိုင်းတွင် ခေါ်ယူခဲ့သေးသည်။ နေပြည်တော်မှ အကြီးအကဲဟု ဆိုသော်လည်း ၎င်းတို့အနေဖြင့် သေချာမသိရှိရဘဲ နေပြည်တော် ယဉ်ထိန်း တပ်ဖွဲ့မှူးမှ တဆင့် ခေါ်ယူထားခြင်း ဖြစ်ကြောင်း၊ ရန်ကုန်ရုံးတွင် ခွင့်ယူထားကြောင်း၊ နေပြည်တော်မှ ခေါ်ဆိုရခြင်း အကြောင်းကို ၎င်းတို့ အဆင့်ဖြင့် မသိရှိနိုင်ကြောင်း ကမာရွတ် ယာဉ်ထိန်းရုံးမှ အရာရှိတဦးက မတ်လ ၂၁ ရက်နေ့က ပြောပြခဲ့ဖူးသည်။

ဒီမိုကရေစီရေး စဉ်ဆက်မပြတ် လှုပ်ရှားသူများ အင်အားစုမှ ဦးထင်ကျော်က ဖိုးလပြည့်လက်သီးနှင့် ထိုးခဲ့သည့် ကိစ္စနှင့် ပတ်သက်၍ မခံနိုင်သောကြောင့် နိုင်ငံသားတဦး၏ တရားဥပဒေ စိုးမိုးရေးကို ပုံဖော်သည့် ပုံစံဖြင့် ကမာရွတ်မြို့နယ် ရဲတပ်ဖွဲ့သို့ သွားရောက်အမှုဖွင့် တိုင်ကြားခဲ့ရာ စခန်းမှူး ဦးအောင်မော်က အမှုတိုင်တန်းချက်ကို လက်ခံခဲ့သော်လည်း အမှုဖွင့်မပေးခဲ့ကြောင်း သိရသည်။

“အမှုဖွင့်တဲ့ တိုင်စာကို လက်ခံထား လိုက်တယ်။ သူ့ဆီမှာ ကမာရွတ် ယဉ်ထိန်းတပ်ဖွဲ့စု ၂၅ က လာရောက် တိုင်ကြား ထားတာ မရှိဘူး။ ကာယကံရှင် ဖြစ်တဲ့ ရဲတပ်သား စံသိန်းထွေးကလည်း လာရောက် တိုင်ကြားထားတာ မရှိတဲ့အတွက် တိုင်စာကို လက်ခံတယ်။ အမှုဖွင့် မပေးဘူး။ လူကြီးကို တင်ပြပေးပါ့မယ်လို့ ပြောတယ်” ဟု သူက ဆိုသည်။

တာဝန် ထမ်းဆောင်နေသော ယူနီဖောင်းဝတ် အစိုးရ၀န်ထမ်းတဦး တာဝန်ချိန်တွင် ပါးရိုက်ခံရခြင်းသည် တရားဥပဒေ စိုးမိုးရေးကို စိန်ခေါ်လိုက်ခြင်း ဖြစ်ကြောင်း၊ ယခုကဲ့သို့ ကာယကံရှင် ကိုယ်စား အမှုလိုက်ဖွင့်နေခြင်းမှာ သက်ဆိုင်သူများကို ပုဂ္ဂိုလ်ရေး မုန်းတီးမှုကြောင့် မဟုတ်ဘဲ ဥပဒေအထက်တွင် မည်သူမျှမရှိကြောင်း သက်သေပြလို၍ ဖြစ်ကြောင်း ဦးထင်ကျော် က ဆိုသည်။

“သူ့ဟာသူ အမှုဖွင့်တာ ဖြစ်ပါလိမ့်မယ်။ ကျနော်နဲ့ မဆိုင်ပါဘူး” ဟု တပ်သား စံသိန်းထွေးက ဧရာဝတီသို့ ပြောသည်။

ယဉ်ထိန်းရဲ တပ်သား စံသိန်းထွေးကိစ္စကို တရားဥပဒေ စိုးမိုးရေးနှင့် တည်ငြိမ်အေးချမ်းရေး ကော်မတီသို့ ကာယကံရှင် ကိုယ်တိုင် တင်ပြလာပါက တရားဥပဒေ စိုးမိုးရေး ရှိစေရန် ဥပဒေနှင့်အညီ ဆောင်ရွက်ပေးနိုင်ကြောင်း၊ ကာယကံရှင် ကိုယ်တိုင် မဆောင်ရွက်လိုသော ကိစ္စကို ၀င်ရောက် ဆောင်ရွက်ပေးရန်မှာ မဖြစ်နိုင်ကြောင်း ယင်းကော်မတီ အတွင်းရေးမှူး ဦးဝင်းမြင့်က ပြောသည်။

“တရားဥပဒေ စိုးမိုးရေးဆိုတာက အာဏာရှိသည်ဖြစ်စေ၊ မရှိသည်ဖြစ်စေ၊ ပစ္စည်းဥစ္စာ ရှိသည်ဖြစ်စေ၊ မရှိသည် ဖြစ်စေ မျက်နှားကြီးငယ် မလိုက်ဘဲနဲ့ ကျောသားရင်သား မခွဲခြားဘဲနဲ့ ဥပဒေရဲ့ ရှေ့မှောက်မှာ အားလုံး အညီအမျှ ဖြစ်ရမယ်။ ဥပဒေကို လေးစားလိုက်နာတဲ့ ပြည်သူတွေအားလုံး ဥပဒေရဲ့ အကာအကွယ်ကို ရရှိခံစားရမယ်။ အဲဒီလိုမှ တရားဥပဒေ စိုးမိုးရေးက ပြည့်စုံတယ်လို့ ပြောလို့ရမယ်” ဟု ၎င်းက ဆိုသည်။

မတ်လ ၁၄ ရက်နေ့ မွန်းလွဲ ၂ နာရီခန့်တွင် ဖိုးလပြည့်သည် ၉ ဂ/ ၉၉၁၄ ကို မောင်းနှင်လာပြီး တက္ကသိုလ်ရိပ်သာ လမ်းနှင့် အင်းလျားလမ်း မီးပွိုင့်တွင် ကားလမ်းရှင်းပေးရန် တောင်းဆိုသောကြောင့် ယဉ်ထိန်းရဲ တပ်သားစံသိန်းထွေးက လမ်းရှင်း ပေးရာ မီးနီနေစဉ် မီးစိမ်းပေးခဲ့သော်လည်း ပွိုင့်ဖြတ်စဉ် မီးဝါသွားသဖြင့် ကားပြန်လှည့်လာပြီး တာဝန်ကျရဲကို လက်သီးဖြင့် ဆင်းထိုးခဲ့ကြောင်း၊ ညနေ ၃ နာရီခန့်တွင် ဗိုလ်မှူးဆိုသူတဦး ထပ်မံရောက်ရှိလာပြီး ယဉ်ထိန်းရဲ တပ်သား စံသိန်းထွေးကို ခေါ်ယူကာ ၎င်း၏ အိမ်တွင် ရေခဲရေဖြင့်ပက်ခြင်း၊ ပါးရိုက်ခြင်းတို့ ပြုလုပ်ခဲ့သေးကြောင်း လူမှုကွန်ရက် အင်တာနက် စာမျက်နှာများတွင် ဖော်ပြထားခဲ့ရာ ဖြစ်စဉ်များမှာ မှန်ကန်ကြောင်း စုံစမ်းမေးမြန်းချက်များအရ သိရသည်။

အစိုးရ ယူနီဖောင်းဝတ် ၀န်ထမ်းတဦးကို တာဝန်ချိန်တွင် လက်ရောက်မှုပြုပါက ပြစ်မှုဆိုင်ရာ ဥပဒေ ပုဒ်မ ၃၂၃ အရ အရေးယူနိုင်ပြီး ပြစ်မှုထင်ရှားပါက ထောင်ဒဏ် တနှစ် (သို့မဟုတ်) ငွေဒဏ် ကျပ် တထောင် ချမှတ်နိုင်ကြောင်း၊ တာဝန် ၀တ္ထရား နှောင့်ယှက်မှုတွင် နှစ်ပိုင်းရှိပြီး ပုဒ်မ ၁၈၆ အရ ပြည်သူ့ဝန်ထမ်းကို ဟန့်တား နှောက်ယှက်သည်ဟု ယူဆပါက ထောင်ဒဏ် ၃ လ (သို့မဟုတ်) ငွေဒဏ် ကျပ် ၅ ရာ၊ ပုဒ်မ ၁၈၉ အရ ပြည်သူ့ ၀န်ထမ်းကို နစ်နာစေမည့် ခြိမ်းခြောက်မှုဟု ယူဆပါက ထောင်ဒဏ်နှင့် ငွေဒဏ်များ ပြစ်ဒဏ်ခံရနိုင်ကြောင်း သိရသည်။

ထက်နိုင်ဇော် - ဧရာဝတီ