နိုင်ငံခြားမဂ္ဂဇင်းတွေက ပုံတွေကို အတုခိုးလိုက်ရိုက်ရင်း ဘော်ဒီအသားပေးပုံတွေ တင်ဖြစ်သွားတာပါလို့ဆိုလာတဲ့ ရွှေရေးထင်ထင်

အွန်လိုင်းပေါ်မှာ ဘော်ဒီအသားပေး ပုံလေးတွေကတစ်ဆင့် အွန်လိုင်းပရိသတ် အခိုင်အမာရရှိခဲ့သူကတော့ ရွှေရေးထင်ထင်ပဲဖြစ်ပါတယ်။ အဆိုပါပုံလေးတွေမှတစ်ဆင့် စာရေးဆရာမတစ်ယောက်ဆိုတာကို သိရှိလက်ခံခဲ့ကြပြီး လက်ရှိမှာ စာရေးတာအပြင် ဇာတ်ညွှန်းရေးသူတစ်ယောက်အနေနဲ့ရော သရုပ်ဆောင်အလုပ်ကိုပါ လုပ်နေပြီဖြစ်တဲ့ ရွှေရေးထင်ထင်နဲ့တွေ့ဆုံခိုက်မှာ

-ဒီနေ့ရိုက်တဲ့ကားလေးအကြောင်းကို အရင်ပြောပြပေးပါဦး။

ကားနာမည်က ချစ်သူအလိုရှိသည်တဲ့။ ရွှေရေး ခေါင်းဆောင်မင်းသမီးအနေနဲ့စရိုက်တဲ့ ဒုတိယကားပေါ့။ ဒါရိုက်တာဦးသိန်းဟန် (ဖီးနစ်) ဇာတ်လမ်းဇာတ်ညွှန်းရွှေရေးပါ။ ဟာသဇာတ်လေးပါပဲ။ အဓိကက အစ်ကိုတစ်ယောက်ရဲ့ မေတ္တာကိုရိုက်ကူးထားတဲ့ကားလေးပါ။ မင်းသားတွေက ကိုရဲအောင်၊ကိုဇေရဲထက်၊ ကိုကောင်းဆက်ထူးပေါ့။ ပထမကားကလဲ ဖီးနစ်ထုတ်လုပ်ရေးအတွက်ပဲ ရိုက်ကူးတယ်။ အိမ်မပိုင်တဲ့ဂေါ်လီ ဆိုတဲ့ဇာတ်ကားပါ။ အဲ့ဒီကားမှာ ကိုခန့်ရယ်၊ ရွှေရေးရယ်၊ ရွှေသမီးရယ်ပါဝင်ပါတယ်။ အဲ့ဒါက အိမ်ထောင်ရေးဒရာမာ ဟာသပုံစံလေးပေါ့။

-ရွှေရေးအနေနဲ့ သရုပ်ဆောင်အလုပ်ကို ဘယ်လိုကနေဘယ်လိုစလုပ်ဖြစ်တာလဲ။

အစကတည်းကရွှေရေးက လုံးချင်းဝတ္ထုတွေ မထုတ်ခင်ကတည်းက ဇာတ်ညွှန်းတွေကို ဒါရိုက်တာတွေဆီမှာပြဖူးတယ်။ ကိုဝိုင်းအပါအ၀င် အခြားဒါရိုက်တာတွေကိုလဲပြဖြစ်တယ်။ အသုံးပြုရွေးချယ်ခံရခြင်း သာမရှိတာ ဒီအသိုင်းအ၀ိုင်းနဲ့က နီးစပ်တယ်လို့ပြောလို့ရတယ်။ နောက်ဦးသိန်းဟန်တို့နဲ့ကလဲ သိတာကြာပြီဆိုတော့ ဇာတ်လမ်းဇာတ်ညွှန်းတွေပြတယ်။ ရိုက်ဖြစ်ကြတယ်။ အဲ့ဒီကနေမှတစ်ဆင့်ရွှေရေးသရုပ်ဆောင် လုပ်ဖို့ဒီနယ်ထဲဝင်တဲ့အချိန်မှာ အန်ကယ်ဦးသန်းဟန် ( ဖီးနစ်) နဲ့အန်တီသဇင်ထူးကနေပြီး မြေတောင်မြှောက်ပေးတာပေါ့။

-အခုဆိုကားပါရိုက်နေပြီဆိုတော့ စာရေးတာနဲ့ကားရိုက်တာကို ဘယ်လိုလေး ခွဲခြားလုပ်သွားမလဲ။

နှစ်ခုလုံးလုပ်ဖြစ်မှာပါ။ ရွှေရေးရဲ့ အဓိကအလုပ်က စာရေးတဲ့ အလုပ်ဆိုတော့လေ။ ရွှေရေးအခု ပထမလုံးချင်း ၀တ္ထု ရွှေကြာဖူးသဲ ထွက်ပြီးပြီ။ အဲ့ဒါကိုလဲ ဇာတ်လမ်းတွဲအနေနဲ့ ပုံဖော်ရိုက်ကူးတော့မယ်။ နောက် ဒုတိယက ကလေးပုံပြင်စာအုပ်ထွက်မယ်။ ပြီးရင် တတိယစာအုပ်အနေနဲ့ ရွှေရေးရေးနေကျ အချစ်၊ ရိုမန့်စ် ပါ ပါဝင်တဲ့ လျှို့ဝှက်သဲဖိုလုံးချင်း ထပ်ထွက်မယ်။ အဲ့ဒါပြီးရင်နောက်ထပ်စာအုပ်တွေ ဆက်တိုက်ထွက်ဖို့ရှိပါတယ်။ ဇာတ်ညွှန်းကိုလဲ ဆက်တိုက်အဆက် မပြတ်ရေးဖြစ်တယ်။ မဂ္ဂဇင်းတွေကိုပို့နေကျတွေလဲ ပုံမှန်အတိုင်းပို့ဖြစ်ပါတယ်။

-ရွှေရေးကို ဓာတ်ပုံတွေကတစ်ဆင့် လူပိုသိခဲ့ရတယ်။ နောက် စာရေးဆရာမဆိုပြီး လက်ခံခဲ့ကြတယ်။ အခုဆိုကားပါရိုက်နေပြီဆိုတော့ အွန်လိုင်းပရိသတ်ရဲ့ အားပေးမှုက ဘယ်လိုရှိလဲ။

ပထမက သရုပ်ဆောင်လုပ်ဖို့ရွှေရေးစိတ်ကူးမရှိဘူး။ စာရေးတာနဲ့ပဲ သွားမယ်ဆိုပြီးဆုံးဖြတ်ထားတယ်။ ရွှေရေးကို မေးတဲ့အခါမှာလဲ သရုပ်ဆောင်မလုပ်ပါဘူးလို့တိတိပပပြောထားတယ်။ ဒါပေမဲ့ဘယ်ကနေ ဘယ်လိုစမှန်းမသိဘူး။ ရွှေရေး သရုပ်ဆောင်နေပြီဆိုတဲ့ ကောလဟလတွေထွက်လာတယ်။ ရွှေရေးက ပရိသတ်တွေက စာအုပ်ကိုလဲမျှော်သလို ဇာတ်ကားတွေဘယ်တော့ထွက်မှာလဲဆိုပြီးမေးလာကြတယ်။ အဲ့ဒါနဲ့ရွှေရေးဇာတ်ကားရိုက်နေတာမဟုတ်ပါဘူးလို့ပြန်ဖြေရတယ်။ အဲ့ဒီမှာ ပရိသတ်တွေကကျွန်တော်တို့က ဇာတ်ကားရိုက်နေပြီဆိုလို့ဇာတ်ကားကိုမျှော်နေတာ ဆိုတဲ့စကားသံတွေအမြဲကြားနေရတဲ့အတွက်ရွှေရေးမရိုက်ပေမဲ့လဲ ရိုက်နေတယ်လို့ထင်နေကြတယ်။ အဲ့ဒါကြောင့် ဒုတိယခြေလှမ်းလှမ်းကြည့်မယ်ဆိုပြီး လှမ်းဖြစ်ခဲ့တာပါ။

-ဘာအတွေ့အကြုံမှမရှိပဲ ခေါင်းဆောင်မင်းသမီးအနေနဲ့ စရိုက်ရတဲ့ ခံစားမှုကိုလဲသိချင်ပါတယ်။

ပထမဦးဆုံးအနေနဲ့စိုးရိမ်မိတယ်။ ဒါရိုက်တာညွှန်ကြားတဲ့အတိုင်းဘောင်ဝင်အောင် အတိအကျ လုပ်နိုင်မလား။ ကိုယ့်ကြောင့် အချိန်နှောင့်နှေးပြီး ရိုက်ရက်တွေကြန့်ကြာကုန်မလား။ ကိုယ်နဲ့တွဲပြီး အလုပ်လုပ်တဲ့မင်းသားတွေ၊ ကိုယ့်ကိုညွှန်ကြားနေတဲ့ ဒါရိုက်တာတွေ၊ စက်အဖွဲ့သားတွေအားလုံးက ကိုယ်အလုပ်လုပ်တာ မဟုတ်တဲ့အတွက်ကြောင့် လုပ်ငန်းခွင်မှာပါ နှောင်းနှေးကုန်မလားလို့စိတ်ပူမိတယ်။ တကယ်တမ်းလူတွေအများကြီးနဲ့တွဲရိုက်ရတဲ့အချိန်မှာ အရမ်းဝမ်းသာပြီးစိတ်လှုပ်ရှားမိတယ်။

-အခုရွှေရေးကားရိုက်နေတဲ့ အချိန် အွန်လိုင်းပေါ်ကိုပုံလေးတွေတက်လာတယ်။ အဲ့ဒါကိုပရိသတ်တွေက ရွှေရေးနဲ့ဇေရဲထက်တို့တွေ့ကြပြီဆိုပြီး Share ကြတာမျိုးတွေရှိတယ်။ အဲ့ဒီအပေါ် ရွှေရေးရဲ့ အမြင်လေးကိုလဲသိချင်ပါတယ်။

ဘယ်လိုမှမမြင်ပါဘူး။ ဘာကြောင့်လဲဆိုတော့ အနုပညာလောကရဲ့သဘောတရားကိုရွှေရေးနားလည်တယ်။ အနုပညာလောကဆိုတာ လူအများ အာရုံစိုက်ကြတဲ့လောကဖြစ်တယ်။ မင်းသားနဲ့မင်းသမီးတစ်ခုခုဆို သူတို့အရမ်းအာရုံစိုက်ကြတယ်။ ဒါပေမဲ့ ရွှေရေးတို့က သဏ္ဍာန်လုပ် သရုပ်တူအောင်လုပ်ရတဲ့အလုပ်ဖြစ်တဲ့အတွက် ရွှေရေးတို့က ကင်မရာဘောင်ထဲမှာသာ မင်းသား မင်းသမီးနှစ်ယောက်ထဲပေါ်တာ ပြင်ပမှာကတော့ စက်အဖွဲ့သားတွေ၊ မိတ်ကပ်ဆံပင်၊ ဒါရိုက်တာတွေ ဆိုတော့ လူအများကြီးနဲ့နေနေရတဲ့ လုပ်ငန်းခွင်မှာ လုပ်နေရတာဆိုတဲ့အတွက်ပြင်ပလူတွေကတော့ ဒီလုပ်ငန်းသဘောကို နားလည်ချင်မှနားလည်လိမ့်မယ်။ အဲ့ဒါကြောင့်လုပ်ငန်းခွင်သဘောကိုနားမလည်တဲ့အတွက်ပြောကြဆိုကြတာမျိုးနေမှာပါ။ ရွှေရေးတို့ကတော့ ကိုယ်တာဝန်ယူထားတဲ့ လုပ်ငန်းကိစ္စကိုအဆင်ပြေပြေချောချောမွေ့မွေ့နဲ့ အကောင်းဆုံးကြိုးစားပြီးလုပ်ကိုင်ကြမယ်ဆိုတဲ့စိတ်နဲ့ပဲသွားနေတာပါ။

-ရွှေရေးကို ကြိုက်လို့ သဘောကျတဲ့လူတွေလဲရှိမယ်။ မကြိုက်လို့ဝေဖန်တဲ့သူတွေလဲရှိတော့ ဒီလိုကောလာဟလတွေနဲ့ကိုယ်ကိုတိုင်ကရော အသားကျမယ်လို့ထင်မိလား။

ရွှေရေးအနေနဲ့တော့ အလုပ်ကိုပဲ အာရုံစိုက်မိတယ်။ ပြင်ပကဝေဖန်မှုတွေကိုသိပ်ပြီးအာရုံမစိုက်မိဘူး။ ဘာကြောင့်လဲဆိုတော့ သူတို့ဝေဖန်နေကြတယ်ဆိုတာ အကြောင်းအမျိုးမျိုးရှိမယ်။ တစ်အချက်က သူတို့သိပ်အလုပ်အားနေလို့၊ လုပ်စရာမရှိလို့တခြားပြင်ပက လူတွေအပေါ်မှာ အာရုံစိုက်မိပြီးတော့ ဒီတစ်ယောက် မဟုတ်ရင်နောက်တစ်ယောက်ကိုပြောမယ်။ တစ်ဦးမဟုတ်တစ်ဦးကို တော့ ပစ်မှတ်ထားပြီးပြောနေကြမှာပဲ။ ဒါဟာသူတို့အလုပ်အားနေလို့ ပြောနေကြတာဖြစ်ပါလိမ့်မယ်။ နှစ်အချက်ကတော့ မနာလိုလို့တိုက်ခိုက်ချင်တာလို့ယူဆတယ်။ အဲ့ဒီလိုလူတွေရဲ့စိတ်ဓာတ်ကတော့သိပ်ကိုအောက်ကျလွန်းသွားပြီ။ အဲ့ဒါတွေကို ရွှေရေးကအချိန်ပေးပြီးခေါင်းစားနေတာမရှိဘူး။ သူတို့တိုက်ခိုက်တဲ့စကားတွေရှိလာလေ ရွှေရေးအတွက်ခွန်အားဖြစ်လာလေပဲ။ ပိုတိုက်ခိုက်လေ ပိုခွန်အားဖြစ်လေပါပဲ။

-ရွှေရေးကိုဆို ပုံတင်ရင် မကြိုက်ကြတာက ခန္ဒာကိုယ်အသားပေးတဲ့ပုံတွေပေါ့။ အဲ့ဒီပုံတွေတင်ရတဲ့ ရည်ရွယ်ချက်ကိုလဲသိချင်ပါတယ်။

ဒါကဒီလိုရှိပါတယ်။ ရွှေရေးစစချင်းတင်တဲ့ပုံတွေတော်တော်များများက ကိုယ့်အိမ်မှာကိုယ်ပြောင်နောက်ရင်း မဂ္ဂဇင်းမော်လ်ဒယ်တွေထဲကပုံတွေ အတုခိုးပြီးရိုက်လိုက်တဲ့ဟာတွေပေါ့။ အပျော်ရိုက်လိုက်တဲ့ ပုံတွေထဲကမှ ဒီပုံလေးကတော့ နိုင်ငံခြားက ဒီလိုပေးထားတဲ့ ပို့စ်လေးနဲ့တော်တော်တူပါလား။ ဒါလေးမိုက်သားပဲ။ ငါတင်လိုက်မယ်ဆိုတဲ့ သာမာန်အတွေးပဲရှိပါတယ်။ ကိုယ့်ပုံကိုယ့်ကြည့်တဲ့အခါမှာ သူများတွေ ဘယ်လိုမြင်လဲဆိုတဲ့ အမြင်မသိဘူး။ သူတို့မျက်လုံးထဲမှာတော့ ဘယ်လိုမြင်လဲမပြောတတ်ဘူး။ ရွှေရေးအမြင်ကတော့ ကိုယ့်ကိုကိုယ်ကြည့်နေကျဆိုတော့ ဒီပုံတော့လှသားပဲဆိုတဲ့ အတွေးပဲမြင်မိတယ်။ မိန်းကလေး တစ်ဦးတစ်ယောက်ဖြစ်တဲ့အတွက် အ၀တ်အစားပေါ်မှာလဲမူတည်တယ်။ Fitting လေးတွေ ၀တ်လိုက်ရင်တော့ ခန္ဒာကိုယ်ပေါ်တဲ့ပုံလေးတွေဖြစ်သွားမယ်။ အပွဝတ်ထားရင်တာ့ အပွဝတ်ထားတဲ့ပုံပေါ်မှာပေါ့။ ဒါကကြည့်တဲ့သူအပေါ်မှာပဲကွဲပြားသွားမယ်လို့ထင်ပါတယ်။

ခင်ဆွေသက် - Trend Myanmar