လူသတ်၍ မီးရထားသံလမ်းဘေး ချုံပုတ်အတွင်း စွန့်ပစ်ခဲ့သူအား စားသောက်ဆိုင် CCTV မှတစ်ဆင့် ဖမ်းဆီးဖော်ထုတ်

တိုက်ကြီးမြို့နယ် ဘူတာရပ်ကွက် မီးရထားသံလမ်းဘေး မိုင်တိုင်အမှတ် (၄၁/၈ နှင့် ၄၁/၉) အကြားရှိ ချုံပုတ်အတွင်း အသက် (၃၅) ခန့်ရှိ အမျိုးသားတစ်ဦး သေဆုံးနေကြောင်း သတင်းအရ ဇန်နဝါရီ ၂၇ ရက် နံနက် ၈ နာရီခွဲက တိုက်ကြီးမြို့ မြို့မစခန်းမှူး ကြည်စိုးသန့်နှင့်အဖွဲ့က သွားရောက်စစ်ဆေးရာ သေဆုံးသူမှာ ယာချိုစောင်းပေါက်ပြဲ၊ နဖူးပေါက်ပြဲဒဏ်ရာများဖြင့် သေဆုံးနေသဖြင့် တိုက်ကြီးမြို့နယ်ဆေးရုံသို့ တင်ပို့ခဲ့ကြောင်း သိရသည်။

ဖြစ်စဉ်နှင့်ပတ်သက်၍ တိုက်ကြီးမြို့ မြို့မစခန်းမှူး ကြည်စိုးသန့်က တရားလိုပြုလုပ်၍ လူသတ်မှုကျူးလွန်သူအား အရေးယူပေးရန် တိုင်တန်း၍ တိုက်ကြီးမြို့မ စခန်းက အမှုဖွင့်စစ်ဆေးရာ အခင်းဖြစ်အရပ်နှင့် ကိုက် ၂ဝဝ ခန့်အကွာတွင် ရန်ကုန်-ပြည်လမ်းဘေးရှိ 'ပိုင်' စတိုးဘေးလမ်းကြားတွင် သွေးကွက်များတွေ့ရှိရပြီး သွေးစွန်းနေသော High class အရက်ပုလင်းခွံ၊ သွေးစွန်း နေသော အုတ်ခဲကျိုးများကို တွေ့ရှိရသဖြင့် အနီးရှိ ''သရက်စ်'' စားသောက်ဆိုင်အား စုံစမ်းရာ အဆိုပါဆိုင်၏ CCTV မှတ်တမ်းအရ ဇန်နဝါရီ ၂၆ ရက် ည ၁ဝ နာရီတွင် သေဆုံးသူပါသုံးဦး အရက်သောက်ခဲ့သည်ကို တွေ့ရှိရသည်။

အရက်သောက်ရာတွင် ပါဝင်သူ ရှမ်းစုရပ်ကွက်နေ သူရဝင်း(ခ)ဟာစန်း (၃၂) နှစ်အား စစ်ဆေးရာ ဇန်နဝါရီ ၂၇ ရက်က ပြစ်မှုကျူးလွန်ကြောင်း ဝန်ခံထွက်ဆိုခဲ့သည်။

သေဆုံးသူမှာ ဂျိုးဖြူကျေးရွာအုပ်စု ဆိပ်သာကျေးရွာနေ စိုးစိုး(ခ)ရဲထွန်းစိုး (၃၂)နှစ်ဖြစ်ပြီး ပြစ်မှုကျူးလွန်ရာတွင်ပါဝင်သူ လက်ပံတန်းမြို့နေသူတစ်ဦးအား ဖမ်းဆီးရမိရေး စစ်ဆေးဆောင်ရွက်လျက်ရှိကြောင်း သိရသည်။

ထွန်းလှိုင်(မြိုင်) / The Mirror Daily