ဒေါသတွေ ဘယ်လိုလျှော့မလဲ (အပိုင်း-၄)

၁ ဒေါသစိတ်ကိုနားလည်မှု

၁.၅ ဒေါသစိတ်ဆိုတာ လူအများစုမှာတော့ အတွေးဒါမှမဟုတ် အဖြစ်အပျက်တွေကြောင့် လွယ်လွယ်ကူကူ ဖြစ်ပေါ်လာတတ်ပါတယ်။ ကိုယ့်ဒေါသက ဘယ်လိုအဖြစ်မျိုးမှာ ပေါ်ထွက်လာသလဲဆိုတာသိဖို့အတွက်တော့ ဒေါသဖြစ်မှုတွေကိုမှတ်တမ်းတင်ထားရင် သိနိုင်ပါတယ်။ ဒေါသစိတ်ဖြစ်ပေါ်လာတတ်တဲ့အခြေအနေကတော့ အဓိကအားဖြင့် ၂ မျိုးပဲရှိပါတယ်။ အဲဒါတွေကတော့ ကိုယ့်ကို ထိခိုက်စေလိမ့်မယ်လို့ ထင်နေတဲ့အခြေအနေနဲ့ တကယ်ထိခိုက်ရတဲ့အခြေအနေတွေပဲ ဖြစ်ပါတယ်။

- ယေဘုယျအကျဆုံး ဒေါသဖြစ်မှုကတော့ ကိုယ်ဖြစ်စေချင်သလို တစ်စုံတစ်ယောက်က လုပ်တာ ဒါမှမဟုတ် မလုပ်တာတွေပဲဖြစ်ပါတယ်။ ဥပမာပြောရရင်တော့ ညစာစားဖို့ချိန်းထားတဲ့သူငယ်ချင်းတစ်ယောက် မပေါ်လာတဲ့ အတွက် ဒေါသဖြစ်တာဟာ ကိုယ်မျှော်လင့်ထားသလို သူက မလုပ်တဲ့အတွက်ကြောင့်ပါပဲ။
- နောက်ထပ်အဖြစ်များတဲ့ဒေါသထွက်စေမှုကတော့ တစ်ခုခုကြောင့် ကိုယ်ထိခိုက်ရတဲ့အချိန်မှာပါ။ ဥပမာ အနေနဲ့ ယာဉ်ကြောပိတ်မှုထဲရောက်နေတာ၊ ကွန်ပြူတာပျက်တာ၊ ဖုန်းဝင်လာပြီး ကျကျသွားတာတွေမျိုးပါပဲ။ ဒီလိုအဖြစ်အပျက်တွေကြုံရတဲ့အတွက် မကောင်းတဲ့နောက်ဆက်တွဲအနေနဲ့ စိုးရိမ်စိတ်တွေဖြစ်လာတတ်ပြီး အဲဒီစိုးရိမ်စိတ်ကြောင့် ဒေါသဖြစ်လာစေပါတယ်။
- ကိုယ်ရည်မှန်းထားတာတစ်ခုခုကို မရတဲ့အချိန်မှာလည်း ဒေါသထွက်တတ်ပါတယ်။ အများအားဖြင့်တော့ အဲဒီအချိန်မှာ ကိုယ့်ကိုယ်ကိုယ်ဒေါသဖြစ်ကြတာပါ။
- ကိုယ့်ကိုအရေးမထားဘူး၊ ဂရုမစိုက်ဘူးဆိုတဲ့စိတ်ကြောင့်လည်း ဒေါသဖြစ်တတ်ကြပါတယ်။ ဒီလိုအဖြစ်တွေ ကတော့ အများအားဖြင့် အလုပ်ခွင်နဲ့ ချစ်ရေးချစ်ရာတွေမှာ ဖြစ်တတ်ပါတယ်။

ညီမင်းဟန်(ဆန္ဒကူး)