၂၀၁၅ မယ်စကြာဝဠာပြိုင်ပွဲတွင် မယ်စကြာဝဠာဘွဲ့ရသူကို မှားယွင်းကြေညာ၊ သရဖူဆောင်း၍ ပရိသတ်ကို ဂါရ၀ပြုပြီးမှ သရဖူ ပြန်ရုပ်သိမ်းခံရ

၂၀၁၅ ခုနှစ် မယ်စကြာဝဠာပြိုင်ပွဲမှာ မယ်စကြာဝဠာဘွဲ့ ဆွတ်ခူးသူကို မှားယွင်းကြေညာမိခဲ့ပြီး မယ်စကြာဝဠာ သရဖူ မှားယွင်းပေးအပ်မိတဲ့ အဖြစ်အပျက် ဖြစ်ပေါ်ခဲ့ပါတယ်။ ဒီဇင်ဘာ ၂၀ ရက်နေ့က အမေရိကန်နိုင်ငံ လက်စ်ဗီးဂတ်စ်မြို့မှာ ကျင်းပခဲ့တဲ့ ၂၀၁၅ ခုနှစ် မယ်စကြာဝဠာပြိုင်ပွဲ နောက်ဆုံးအဆင့်မှာ ဖိလစ်ပိုင်အလှမယ် အလွန်ဇိုဝက်ဇ်ဘက်ခ်ျ၊ ကိုလံဘီယာအလှမယ် အရီဗာလိုနဲ့ အမေရိကန် အလှမယ် အိုလီဗီယာဂျော်ဒန်တို့ ယှဉ်ပြိုင်ခဲ့ကြပါတယ်။

အဲဒီနောက်မှာတော့ မယ်စကြာဝဠာ ပြိုင်ပွဲအစီအစဉ် ကြေညာသူ စတိဗ်ဟာဗေးက မယ်စကြာဝဠာဘွဲ့ကို ကိုလံဘီယာ အလှမယ် အရီဗာလို ဆွတ်ခူးခဲ့တယ်လို့ ကြေညာခဲ့ပါတယ်။ ဒီအတွက် မယ်စကြာဝဠာဟောင်း ပေါ်လီနာဗီဂါက အရီဗာလိုကို မယ်စကြာဝဠာ သရဖူ ဆောင်းပေးခဲ့ပြီး အရီဗာလိုကို ပရိသတ်တွေကို ဂါရ၀ပြု နှုတ်ဆက်ခဲ့ပါတယ်။

ဒါပေမဲ့ ခဏအကြာမှာတော့ စတိဗ်ဟာဗေးက ဒုတိယဆုရတဲ့ အရီဗာလိုကို မယ်စကြာဝဠာအဖြစ် မှားယွင်းကြေညာမိခဲ့တဲ့အတွက်တောင်းပန်ပါတယ်လိုပြောခဲ့ပြီး မယ်စကြာဝဠာဘွဲ့ ဆွတ်ခူးနိုင်ခဲ့တာ ဖိလစ်ပိုင် အလှမယ် အလွန်ဇိုဝက်ဇ်ဘက်ခ်ျဖြစ်တယ်လို့ ထပ်မံကြေညာခဲ့ပါတယ်။

ဒီအတွက်ကြောင့် ပေါ်လီနာဗီဂါက ကိုလံဘီယာအလှမယ် အရီဗာလို ဆောင်းထားတဲ့ သရဖူကို ပြန်ချွတ်ပြီး အလွန်ဇိုဝက်ဇ်ဘက်ခ်ျကို သရဖူ ဆောင်းပေးခဲ့ပါတယ်။ ဒီအဖြစ်အပျက်နဲ့ ပတ်သက်လို့ စတိဗ်ဟာဗေးက အလှမယ်နှစ်ဦးစလုံးကို တောင်းပန်ခဲ့ပြီး သူ့ရဲ့အမှားအတွက် အရမ်းနောင်တရမိတယ်လို့ တွစ်တာစာမျက်နှာမှာ ရေးသားဖော်ပြခဲ့ပေမယ့် လူမှုကွန်ယက် စာမျက်နှာတွေမှာတော့ ဒီအဖြစ်အပျက်ကို လှောင်ပြောင်ဝေဖန်မှုတော်တော်များများ ရှိခဲ့ပါတယ်။

Nz (ရိုးရာလေး)