ပရဟိတအလုပ်လုပ်သူ IS အတွက် ရံပုံငွေရှာပေးလို့ဆို

လက်ဘနွန်မှာ အဖမ်းခံခဲ့ရသူ Ibrahim Barakat ကို တွေ့ရစဉ် (Credit: ABC licensed)

သြစတြေးလျနိုင်ငံ မဲလ်ဘုန်းမြို့က ပရဟိတ လုပ်ငန်း လုပ်ကိုင်တဲ့ အဖွဲ့ရဲ့ အဖွဲ့ဝင်တချို့ဟာ IS အစ္စလာမ်မစ် စစ်သွေးကြွတွေအတွက် ရံပုံငွေတွေ ရှာဖွေပေးခဲ့တယ်လို့ သိရပါတယ်။

Dar al Quran လို့ခေါ်တဲ့ ပရဟိတ အဖွဲ့ဟာ ဆီးရီးယားနိုင်ငံက မိဘမဲ့ ကလေးငယ်တွေအတွက် ရံပုံငွေတွေ ရရှိအောင် ရှာဖွေပေးတဲ့အဖွဲ့ ဖြစ်ပါတယ်။

ဒါပေမဲ့ Ibrahim Barakat လို့ခေါ်တဲ့ အဖွဲ့ဝင် တစ်ယောက်ကို လက်ဘနွန်အစိုးရက မေလ ၂ ရက်နေ့မှာ ဖမ်းဆီးပြီးတဲ့နောက် အဲဒီအဖွဲ့အပေါ် သံသယ ဖြစ်လာတာ ဖြစ်ပါတယ်။

Ibrahim Barakat ကို လက်ဘနွန် စစ်ခုံရုံးမှာ စစ်ဆေးနေပြီး ဂျီဟတ်ဒစ် လုပ်ငန်းအတွက် ရံပုံငွေ ရှာပေးသူအဖြစ် စွပ်စွဲခံနေရပါတယ်။

သူဟာ ဒေါ်လာ ထောင်နဲ့ချီကို ယူပြီး ဆီးရီးယားထဲ ဝင်ဖို့ ကြိုးစားတုန်း ဖမ်းဆီးခံခဲ့ရတာပါ။

ဆီးရီးယားနိုင်ငံက အကြမ်းဖက် အဖွဲ့ကို ငွေတွေ ထောက်ပံ့တယ်ဆိုပြီး စစ်ဆေးခံနေရပါတယ်။

ဒါ့အပြင် လက်ဘနွန်နဲ့ သြစတြေးလျနိုင်ငံသား ၂ ခုစလုံး ခံယူထားတဲ့ နောက်လူ နှစ်ယောက်ကိုလည်း အာဏာပိုင်တွေက သံသယဖြစ်နေတယ်လို့ အေဘီစီက သိရပါတယ်။

ဒီလို အခြေအနေကြောင့် ပရဟိတ လုပ်ငန်းတွေ သမာသမ ကျကျ လုပ်ဆောင်ခြင်း ရှိမရှိကို စောင့်ကြည့်နေတဲ့ အဖွဲ့ကလည်း ဆစ်ဒနီမြို့က Dar al Quran အဖွဲ့အပေါ် စုံစမ်းမှုတွေ လုပ်သွားမယ်လို့ ပြောပါတယ်။

သြစတြေးလျ ရဲတွေကတော့ အဲဒီ ပရဟိတ အဖွဲ့အစည်းအပေါ် စုံစမ်းထောက်လှမ်းမှု လုပ်နေသလား ဆိုတာကို ဖြေဆိုခြင်း မရှိခဲ့ပါဘူး။

သြစတြေးလျနိုင်ငံသား တချို့ဟာ အကြမ်းဖက်အဖွဲ့တွေကို ငွေကြေးထောက်ပံ့မှုတွေ လုပ်တယ်ဆိုတဲ့ ပြောဆိုမှုတွေကြောင့်လည်း အခုဆိုရင် ငွေလွဲပေးရာမှာ တင်းကြပ်မှုတွေ ရှိလာနေကြောင်း သိရပါတယ်။

ABC Radio Australia