အမေရိကန်တွင် ထိပ်တန်း လူငယ်ခေါင်းဆောင်အဖြစ် ရွေးချယ်ခံရသည့် မြန်မာဒုက္ခသည်

မုဒီ။ (ဓာတ်ပုံ - wfaa.com)

အမေရိကန်ပြည်ထောင်စု ဒါးလတ်စ်အရှေ့ပိုင်း အထက်တန်းကျောင်းက မြန်မာဒုက္ခသည် ကရင်လူမျိုး ဆယ်ကျော်သက် ကျောင်းသူ မုဒီကို ငယ်ရွယ်တဲ့ ထိပ်တန်း လူငယ်ခေါင်းဆောင်အဖြစ် ရွေးချယ်ထားပါတယ်။

ကျောင်းက တခြားကျောင်းသားတွေနဲ့ မုဒီရဲ့ ကွာဟချက်ကတော့ အများစုက ပြဿနာကို ဖြေရှင်းဖို့ စဉ်းစားနေချိန်မှာ မုဒီက လက်တွေ့ကျကျ ဖြေရှင်းတယ်လို့ သူ့ဆရာမ ပြောဆိုတာကို ကိုးကားပြီး ဒဗလျူအက်ဖ်အေအေ သတင်းမှာ ဖော်ပြပါတယ်။

မုဒီရဲ့ အောင်မြင်မှုတခုကတော့ ဒါးလတ်စ် လူငယ်ကော်မရှင်ကို လျှောက်ထားဖို့ တောင်းဆိုခံရတာ ဖြစ်ပါတယ်။

ကျောင်းသားခေါင်းဆောင်တွေ ပါဝင်တဲ့ ဒီကော်မရှင်က ဒါးလတ်စ် မြို့တော်ကောင်စီကို အကြံဉာဏ်နဲ့ အမြင်တွေ ထောက်ပံ့ပေးရတာ ဖြစ်ပါတယ်။

မုဒီက ကော်မရှင်ကို လျှောက်ထားခြင်းမရှိပေမယ့် ပွဲတခုမှာ ကော်မရှင်အဖွဲ့ဝင် မတ်ခ်ကလေတန်နဲ့ တွေ့ဆုံ စကားပြောခဲ့ပြီး လျှောက်ထားဖို့ တောင်းဆိုခဲ့တာ ဖြစ်ပါတယ်။

မုဒီကတော့ လူ့အခွင့်အရေးကိစ္စတွေ၊ အိမ်တွင်းအကြမ်းဖက်မှုတွေကို မီးမောင်းထိုးပြရတဲ့ ကိစ္စတွေကို စိတ်ဝင်စားပြီး ကမ္ဘာကို ပိုမိုကောင်းမွန်တဲ့ နေရာတခုအဖြစ် လုပ်ဆောင်ဖို့ ဆန္ဒရှိနေတယ်လို့ ပြောပါတယ်။

ဒါ့အပြင် မြန်မာပြည် တိုင်းရင်းသားဒေသက စစ်ပွဲတွေအကြောင်း၊ စစ်သားတွေက ရွာသားတွေရဲ့ အိမ်တွေကို မီးရှို့ပြီး အမျိုးသမီးတွေကို မုဒိမ်းကျင့် သတ်ဖြတ်တဲ့ အကြောင်းတွေ၊ အမျိုးသားတွေကို ခေါ်ဆောင်သွားသလို ကြင်နာမှုကင်းတဲ့ အကြောင်းတွေကိုလည်း မုဒီက ပြောပြပါတယ်။

လွန်ခဲ့တဲ့ ၁၀ နှစ်လောက်က မုဒီတို့မိသားစုဟာ ထိုင်း-မြန်မာနယ်စပ် ဒုက္ခသည်စခန်းကနေ အမေရိကန်နိုင်ငံ တက္ကဆက်ကို လာရောက် အခြေချ နေထိုင်ခဲ့ပါတယ်။

DVB