လက်နက်ကိုင် တိုင်းရင်းသားခေါင်းဆောင်များ လော်ခီးလာရောက်ရှိ

လက်နက်ကိုင် တိုင်းရင်းသားအဖွဲ့ခေါင်းဆောင်များ ထိပ်သီးညီလာခံ တက်ရောက်ဖို့အတွက် တိုင်းရင်းသားခေါင်းဆောင်တွေဟာ ကရင်အမျိုးသားအစည်းအရုံး (ကေအန်ယူ) ထိန်းချုပ်နယ်မြေ လော်ခီးလာကို ဇွန် ၁ ရက်က ရောက်ရှိလာကြပါတယ်။
-
ဇွန် ၂ ရက်ကနေ ၆ ရက်နေ့အထိ ကျင်းပမယ့် ဒီညီလာခံ တက်ရောက်ဖို့ လက်ကိုင်အဖွဲ့ ၁၆ ဖွဲ့ကို ဖိတ်ကြားထားပြီး တဖွဲ့ကို ကိုယ်စားလှယ် ၅ ဦးနဲ့ လေ့လာသူ ၂ ဦးစီ ဖိတ်ကြားထားတယ်လို့လည်း ကေအန်ယူ အတွင်းရေးမှူးရုံး တာဝန်ရှိသူတဦးက ပြောပါတယ်။
-
ဒီညီလာခံမှာ အစိုးရနဲ့ အပြီးသတ် လက်မှတ်ရေးထိုးဖို့ ကျန်ရှိနေတဲ့ တနိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူ စာချုပ်မူကြမ်း (အန်စီအေ) နဲ့ပတ်သက်ပြီး တိုင်းရင်းသားခေါင်းဆောင်တွေအကြား ပြန်လည်သုံးသပ် ဆွေးနွေးကြဖို့ ရှိနေပါတယ်။
-
ဒါ့အပြင် လက်ရှိ အစိုးရနဲ့ တိုက်ပွဲဖြစ်ပွားနေတဲ့ ကုိုးကန့်၊ ပလောင်နဲ့ ရခုိုင်တပ်မတော်တုို့ကလည်း တနိုင်ငံလုံး အပစ်အခတ်ရပ်စဲရေး ညှိနှိုင်းရေးအဖွဲ့ (အန်စီစီတီ) အဖွဲ့ကနေ ပါဝင်မှုရပ်စဲဖို့ ကိစ္စတွေကိုလည်း ဆွေးနွေးသွားမှာဖြစ်တယ်လို့ ကိုးကန့်တပ်ဖွဲ့ ပြောခွင့်ရသူ ဦးထွန်းမြတ်လင်းက ပြောပါတယ်။
-
တနိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူ စာချုပ်မူကြမ်း (အန်စီအေ) ပါ စာသားတွေကို ပြည်ထောင်စု ငြိမ်းချမ်းရေးဖော်ဆောင်ရေး လုပ်ငန်းကော်မတီ (ယူပီဒဗလျူစီ) နဲ့ တနိုင်ငံလုံး အပစ်အခတ်ရပ်စဲရေး ညှိနှိုင်းရေးအဖွဲ့ (အန်စီစီတီ) တို့အကြား ပြီးခဲ့တဲ့ မတ်လကုန်က ရန်ကုန်မှာ သဘောတူညီမှု ရခဲ့ပါတယ်။
-
ဒီစာချုပ်ကို အပြီးသတ် သဘောတူလက်မှတ် ရေးထိုးနိုင်ဖို့ အစိုးရဘက်က အသင့်ဖြစ်နေပြီလို့ သမ္မတ ဦးသိန်းစိန်က ပြောထားပေမယ့် တိုင်းရင်းသား လက်နက်ကိုင်တွေဘက်ကတော့ ခေါင်းဆောင်တွေကို ပြန်လည်ချပြ ဆွေးနွေးအတည်ပြုချက် ရယူဦးမယ်လို့ ပြောထားတာပါ။
-
ညီလာခံတက်ရောက်လေ့လာဖို့အတွက် ကုလသမဂ္ဂ အတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးအကြံပေး မစ္စတာ ဗီဂျေနမ်ဗီးယားနဲ့ တရုတ်သံတမန်တွေအပြင် ပြည်တွင်းက သတင်းသမား ၂၀ ကျော်လည်း သတင်းယူဖို့ ရောက်ရှိနေပါတယ်။

DVB