ပခုက္ကူတွင် ရွာနှစ်ရွာ ခိုက်ရန်ဖြစ်ပွား

ဓာတ်ပုံ - ပခုက္ကူ ဂျာနယ်လစ်ဖေ့စ်ဘွတ်ခ်

ပခုက္ကူမြို့နယ်မှာ အရှေ့ချောက်ကန်ရွာနဲ့ အနောက်ချောက်ကန် ရွာနှစ်ရွာ ခိုက်ရန်ဖြစ်ကြတဲ့အတွက် ရဲအင်အား ၇၀ လောက်နဲ့ လုံခြုံရေးပေးနေရပါတယ်။

ဧပြီ ၃၀ ရက်နေ့ ညနေမှာ ဖြစ်ခဲ့ပြီး ရွာပတ်ဝန်းကျင်မှာလည်း မီးလောင်တာတွေ ဖြစ်ခဲ့ပါတယ်။

‘‘မီးသတ်ကား သုံးစီးသွားတာတွေ့တယ်။ ရဲကားတွေလည်း စောစောကပဲ သွားတာတွေ့တယ်” လို့ အဲဒီရွာသွားတဲ့ လမ်းအနားမှာ ရောက်နေတဲ့ ကိုဉာဏ်ရည်ဖြိုးက ဧပြီ ၃၀ ရက်နေ့ ညနေ ၇ နာရီအချိန်က ဒီဗွီဘီကို ပြောပါတယ်။

ဧပြီ ၂၈ ရက်က ရွာဘုန်းကြီးပျံပွဲမှာ ရွာသား အချင်းချင်းဖြစ်ခဲ့တဲ့ရန်ပွဲက စဖြစ်တာလို့ ပခုက္ကူမြို့မ ရဲစခန်းတာဝန်ကျ ရဲအရာရှိက ပြောပါတယ်။

“ရိုက်ခံရတဲ့ ရွာဘက်က လာတိုင်လို့ အမှုဖွင့်ထားပြီးပါပြီ။ တရားခံက တယောက်ပဲ သိရပြီး အဲဒီတယောက်က တိမ်းရှောင်နေတယ်။ ခုတော့ ကျနော်တို့ စခန်းနဲ့ ခရိုင်က ရဲအင်အား ၇၀ လောက်နဲ့ ရွာနှစ်ရွာကြားမှာ လုံခြုံရေးပေးနေပါတယ်” လို့ ဒုရဲအုပ်ဌေးဝင်းက ဒီဗွီဘီကို ပြောပါတယ်။

ရိုက်ခဲ့တဲ့ ရွာသားကို အပ်ဖို့ နှစ်ဖက်ရွာလူကြီးတွေ ညှိနှိုင်းခဲ့ကြပေမယ့် အခြေအနေ တင်းမာခဲ့တာကြောင့် နယ်ထိန်းရဲတပ်ဖွဲ့က သွားရောက်ခဲ့ကြတာလို့ ဆိုပါတယ်။

ရွာပတ်ဝန်းကျင်မှာ မီးလောင်တာကတော့ ရှို့မီးလည်းဖြစ်နိုင်ပေမယ့် အတိအကျတော့ မသိရသေးဘူးလို့လည်း ဒုရဲအုပ်ဌေးဝင်းက ပြောပါတယ်။

ဒီနေ့မနက် မြန်မာစံတော်ချိန် ၁၁ နာရီ ပခုက္ကူမြို့မရဲစခန်းကို ဆက်သွယ်မေးမြန်းရာမှာတော့ အခုချိန်ထိ လုံခြုံရေး ယူထားရဆဲဖြစ်ပြီး နှစ်ဘက်ရွာသားတွေ ထိခိုက်မှု မရှိဘူးလို့ ပြောပါတယ်။

ပိုင်စိုး - DVB