ဝန်ကြီးနှစ်ဦး နှုတ်ထွက်သွားမှုကိစ္စ ဦးရဲထွဋ် ရှင်းလင်းပြောကြား

ရာထူးက အနားပေး ခံရတဲ့ ပြန်ကြားရေး ဝန်ကြီး ဦးအောင်ကြည်နဲ့ ကျန်းမာရေး ဝန်ကြီး ဒေါက်တာ ဖေ သက်ခင်တို့ဟာ သမ္မတဦးသိန်းစိန်ရဲ့ တတိယအ ဆင့် ပြုပြင် ပြောင်းလဲရေးမှာ ပါဝင် ဆောင်ရွက်နိုင်ခြင်း မရှိတဲ့ အတွက်ကြောင့် နှုတ်ထွက်သွားခြင်း ဖြစ်ေ ကြာင်း ပြန် ကြားရေး ဝန်ကြီးအဖြစ် အဆိုပြု ခံထားရသူ သမ္မတရဲ့ ပြောခွင့်ရ ပုဂ္ဂိုလ် ဦးရဲထွဋ်က ပြောပါတယ်။

ပြည်ထောင်စုအဆင့် ဝန်ကြီးနှစ်ဦး ရာထူးကနေ ရုတ်တရက်နှုတ်ထွက်သွား ခဲ့တဲ့အပေါ် ထွက်ပေါ်လာ တဲ့ ကောလာဟလတွေနဲ့ ပတ်သက်လို့ RFA က ဆက်သွယ်မေးမြန်းစဉ်မှာ ဦးရဲထွဋ်က အခုလို ဖြေကြား ခဲ့တာပါ။

"ပြည်ထောင်စုဝန်ကြီး ဦးအောင်ကြည်နဲ့ ဒေါက်တာ ဖေသက်ခင် တို့ထွက်တာက တချို့ပြောနေသလို အဂတိလိုက်စားမှုတွေ ကျန်တဲ့ကိစ္စတွေနဲ့ မဆိုင်ပါဘူး၊ အဓိကက သူတို့နှစ်ဦးကိုယ်တိုင်က ပြုပြင်ပြောင်း လဲရေးလုပ်ငန်းရဲ့ တတိယအဆင့်မှာ ရင်ဆိုင်နေရတဲ့ တောင်းဆိုမှုတွေ၊ လျှင်လျှင်မြန်မြန်နဲ့ ရလာဒ်ကောင်းတွေ ပေါ်ထွက်လာဖို့ လိုအပ်ချက်တွေကို ဖြည့်ဆည်းနိုင်ဖို့အတွက် အခက်အခဲရှိတယ်လို့ ယုံကြည်တဲ့အတွက်ကြောင့်မို့ သူတို့ဆန္ဒအလျောက် နှုတ်ထွက်ခွင့် ပေးဖို့ ဆိုပြီးတော့ သမ္မတကြီးကို တင်ပြတာ"

အခုလစ်လပ်နေတဲ့ ပြန်ကြားရေးဝန်ကြီးဌာန ပြည်ထောင်စုဝန်ကြီးနေရာအတွက် ဒုတိယ၀န်ကြီး ဦးရဲထွဋ်နဲ့ ကျန်းမာရေးဝန်ကြီးဌာန ပြည်ထောင်စုဝန်ကြီးနေရာအတွက် ဒုတိယ၀န်ကြီး ဒေါက်တာ သန်းအောင် ကိုခန့်အပ်ဖို့ နိုင်ငံတော်သမ္မတ ဦးသိန်းစိန်က ပြည်ထောင်စုလွှတ်တော်ထံ ဇူလိုင် ၂၉ ရက်နေ့က သ၀ဏ်လွှာပေးပို့ အဆိုပြုထားပါတယ်။

RFA Burmese