အာစီအက်စ်အက်စ်/အက်စ်အက်စ်အေနှင့် တီအန်အယ်လ်အေတပ်တို့ တိုက်ပွဲဆက်ဖြစ်

ဓာတ်ပုံ - တီအန်အယ်လ်အေ

ရှမ်းပြည်နယ် နမ့်ခမ်းမြို့နယ် မိုင်းဝီးဒေသမှာ ရှမ်းပြည်ပြန်လည်ထူထောင်ရေးကောင်စီ၊ ရှမ်းပြည်တပ်မတော်တောင်ပိုင်း (အာစီအက်စ်အက်စ်/အက်စ်အက်စ်အေ) နဲ့ တအာင်းအမျိုးသား လွတ်မြောက်ရေးတပ် (တီအန်အယ်လ်အေ) တို့အကြား ဒီဇင်ဘာ ၉ ရက်နေ့က တိုက်ပွဲတွေ ထပ်ဖြစ်နေတယ်လို့ (အာစီအက်စ်အက်စ်/အက်စ်အက်စ်အေ) ပြောခွင့်ရ ဗိုလ်မှူးစိုင်းလက ပြောပါတယ်။

အာစီအက်စ်အက်စ်/အက်စ်အက်စ်အေက တအာင်းပလောင်ဒေသကို နယ်မြေကျူးကျော် ၀င်ရောက်တယ်ဆိုပြီး တအာင်းပလောင်နဲ့ မဟာမိတ်အဖွဲ့တွေက လိုက်လံတိုက်ခိုက်တာလို့ ဗိုလ်မှူးစိုင်းလက ပြောပါတယ်။

“အခုနလည်း တိုက်နေတုန်းပါပဲ။ အဓိက မိုင်းဝီးဒေသမှာဖြစ်တယ်။ တီအန်အယ်လ်အေရဲ့ နယ်မြေတွေကို ကျနော်တို့က သွားလုယူလို့ဆိုပြီးတော့ သူတို့က စစ်အင်အားနဲ့ လာတိုက်တာပဲ။ နမ့်ခမ်းဒေသဟာ ပလောင်အုပ်ချုပ်ခွင့်ရဒေသလည်း မဟုတ်ပါဘူး။ ကချင်ပြည်နယ်လည်း မဟုတ်ဘူး။ ရှမ်းပြည်နယ်ဖြစ်ပါတယ်။ ဒီနယ်မြေတွေဟာ ရှမ်းပြည်သားတွေ ပိုင်တဲ့နယ်မြေ ဖြစ်ပါတယ်။ တီအန်အယ်လ်အေ လက်နက်ပြန်မကိုင်ခင်ကတည်းက ကျနော်တို့တပ်ဖွဲ့တွေ အဲဒီမှာ အခြေစိုက်ထားပြီးသား ဖြစ်ပါတယ်။ ဘယ်လိုအကြောင်းပေါ်မှာ အခြေခံပြီးတော့ ကျနော်တို့က သူတို့နယ်မြေကို သွားလုယူသလဲဆိုတာ ဘယ်လို ပြောနိုင်သလဲလို့ ပြန်မေးချင်ပါတယ်။”

အဲဒီဒေသမှာ နိုဝင်ဘာ ၂၇ ရက်နေ့ကတည်းက ဒီကနေ့ထိ နှစ်ဘက်အကြား မကြာခဏ တိုက်ပွဲတွေ ဖြစ်ပွားနေတာလို့ ဆိုပါတယ်။

တီအန်အယ်လ်အေ ပြောခွင့်ရသူ မိုင်အိုက်ကျော်ကို ဒီဗွီဘီက ဆက်သွယ်မေးမြန်းရာမှာတော့ ဒီရက်ပိုင်း တိုက်ပွဲဖြစ်တာ မကြားရသေးကြောင်းနဲ့ နိုဝင်ဘာလ ၃၀ ရက်နေ့က နောက်ဆုံးတိုက်ပွဲဖြစ်ပွားခဲ့တာလို့ ပြောပါတယ်။

ဒါပေမယ့် ဒီဇင်ဘာ ၆ ရက်နေ့ ရက်စွဲနဲ့ ထုတ်ပြန်တဲ့ တီအန်အယ်လ်အေ ကြေညာချက်မှာတော့ ‘တီအန်အယ်လ်အေ လှုပ်ရှားနယ်မြေတချို့ဖြစ်တဲ့ ကျောက်မဲ၊ နမ့်ဆန်၊ မန်တုံနှင့် နမ့်ခမ်းမြို့နယ် ဒေသအတွင်းသို့ ရှမ်းပြည်တပ်မတော် အာစီအက်စ်အက်စ်/အက်စ်အက်စ်အေဟာ နယ်မြေကျူးကျော် ၀င်ရောက်လှုပ်ရှားလာတဲ့အတွက် နှစ်ဘက်ထိတွေ့မှု တိုက်ပွဲဖြစ်ပွားခဲ့ကြောင်းနဲ့ တချို့သော ပြောက်ကျားနယ်မြေမှာ တအာင်းတပ်မတော်နဲ့အတူ ကချင်လွတ်လပ်ရေးတပ်မတော်၊ ရှမ်းပြည်တပ်တော် အာစီအက်စ်အက်စ်/အက်စ်အက်စ်အေ တပ်တွေနဲ့အတူ အခြေချ လှုပ်ရှားပြီး မြန်မာ့တပ်မတော်ရဲ့ ထိုးစစ်ကြောင်းတွေကို ပူးတွဲခုခံတိုက်ခိုက် တိုက်ပွဲဝင်မှု တခါတရံ ပြုလုပ်ကြတယ်။’ လို့ ဖော်ပြထားပါတယ်။

ဒါ့အပြင် အာစီအက်စ်အက်စ်/အက်စ်အက်စ်အေ တပ်ဖွဲ့ဘက်ကနေ အစိုးရတပ်က ကူညီတိုက်ခိုက်ပေးတယ်လို့လည်း တီအန်အယ်လ်အေရဲ့ ထုတ်ပြန်ချက်မှာ ဖော်ပြထားပါတယ်။

အာစီအက်စ်အက်စ်/အက်စ်အက်စ်အေ ပြောခွင့်ရသူ ဗိုလ်မှူးစိုင်းလကတော့ ဒါဟာ တဘက်သတ် စွပ်စွဲတာဖြစ်တယ်လို့ ပြောပါတယ်။

“တိုင်းရင်းသားအချင်းချင်း တိုက်နေတယ်ဆိုတာ ဘယ်ကောင်းမှာတုန်း။ တိုင်းရင်းသားအချင်းချင်း မပြောနဲ့ အစိုးရတပ်ကိုတောင်မှ ကျနော်တို့က မတိုက်ချင်တော့လို့ အန်စီအေ လက်မှတ်ထိုးတာပဲဖြစ်တယ်။ ဖြစ်နေတဲ့ ပြဿနာအားလုံးကို စစ်ရေးနည်းနဲ့ မဖြေရှင်းဘဲနဲ့ ငြိမ်းချမ်းတဲ့နည်းလမ်းနဲ့ နိုင်ငံရေးနည်းလမ်းနဲ့ ဖြေရှင်းကြဖို့ ကျနော်တို့ အဲဒီနည်းလမ်းကို ရွေးချယ်တာပဲဖြစ်တယ်။”

ရှမ်းပြည်နယ်အတွင်းမှာ ဖြစ်ပွားနေတဲ့ တိုက်ပွဲတွေကြောင့် ဒေသခံထောင်ချီ ထွက်ပြေး တိမ်းရှောင်နေကြရပါတယ်။

နော်နိုရင်း - DVB