လေပြင်းကြောင့် စစ်ကိုင်းတိုင်းမှာ လူ ၃ ဦး သေဆုံး

လက်ပံတန်းမြို့မှာ ဧပြီလ ၂၃ ရက်နေ့က လေပြင်းများ တိုက်ခတ်စဉ်။ Photo: Kyaw Zaw Win/RFA

စစ်ကိုင်းတိုင်းဒေသကြီးအတွင်းက မြို့နယ်တချို့မှာ အခုရက်ပိုင်းအတွင်း လေပြင်းတိုက်ခတ်မှုကြောင့် လူ ၃ ဦး သေဆုံးမှုရှိခဲ့တယ်လို့ ဒေသခံတွေက ပြောပါတယ်။

တမူးမြိ့နယ်မှာ မနေ့ညက လေပြင်းတိုက်ခတ်ပြီး မိုးသီးကြွေတာကြောင့် အိမ်ခြေတစ်ရာကျော် ပျက်စီး ခဲ့ရသလို သစ်ပင်နဲ့ ဓာတ်တိုင်တွေ၊ နေအိမ်တွေပြိုလဲ ပျက်စီးခဲ့ပြီး အမျိုးသမီးတစ်ဦးလည်း သေဆုံးခဲ့တယ်လို့ တမူးမြို့ခံ ဦးမော်စီက ပြောပါတယ်။

"မိုးသီးကျတဲ့အချိန်မှာပဲ လေတိုက်တယ်ပေါ့နော်၊ အိမ် ၁ဝဝ နီးပါးလောက် အိမ်ခေါင်မိုးတွေလန်တယ်၊ ဓါတ် တိုင် ၅ ချောင်းလောက် လေတိုက်လို့ကျိုးသွားတယ်၊ သစ်ပင်ကတော့ ရာနဲ့ချီပြီး ကျိုးသွားတယ်၊ အမျိုးသမီး တစ်ယောက်က မကြီးပင်ပိပြီး သေတယ်ပေါ့နော်"

ပြီးခဲ့တဲ့ ဧပြီလ ၂၁ ရက်နေ့ကလည်း ပခုက္ကူ ၊ ရေစကြို ၊ ကန့်ဘလူ၊ ကောလင်းနဲ့ ဝန်းသိုမြို့တွေမှာ မိုးကြီး ပြီး လေပြင်းတိုက်ခိုက်ခဲ့တာကြောင့် လူနေအိမ်တွေ၊ အဆောက်အအုံတွေနဲ့ သီးနှံစိုက်ခင်းတွေ ပျက်စီးခဲ့ပါတယ်။

နေအိမ်နဲ့ သစ်ပင်တွေ ပြိုကျမှုကြောင့် ကောလင်းမြို့နဲ့ ရေစကြိုမြို့မှာ အမျိုးသားတစ်ဦးနဲ့ အမျိုးသမီးတစ်ဦး လည်း သေဆုံးခဲ့ပါတယ်။

မြန်မာနိုင်ငံ အလယ်ပိုင်းနဲ့ အထက်ပိုင်းဒေသတွေမှာ လာမယ့်မေလအထိ မိုးသက်လေပြင်း တိုက်ခိုက် မှုတွေ ဖြစ်ပေါ်နိုင်တယ်လို့ မိုးလေ၀သပညာရှင်တွေက ခန့်မှန်းထားပါတယ်။

RFA Burmese